DÍLI, MJ – S.E. Ministru Justisa Ivo Valente prezide reuniaun Konsellu Konsultivu ne’ebé involve Diretór-Jerál, Inspetór-Jerál, Diretór PSIK no Diretór Nasionál sira iha ámbitu Ministériu Jutisa, iha Sala Reuniaun Ministériu Justisa, Díli, loron Kinta-Feira (05/05/2016).

Reuniaun regulár Konsellu Konsultivu Ministériu Justisa kada fulan ne’e hodi diskute progressu ezekusaun atividade no orsamentu to’o iha fulan-Abril 2016, buka solusaun ba dezafiu sira, no assuntu diversus balun tán.

Iha abertura ba reuniaun ne’e Ministru Ivo Valente hato’o nia lian katak, “ohin ita atu aprezenta relatóriu servisu loron-loron nian, sá servisu mak hala’o ona iha fulan-Abril, tuir duni planu ka la’e no sá planu prioridades iha fulan-Maiu ida ne’e nian.”

“Antes ha’u fó tempu ba ita-bót sira idak-idak, ha’u hakarak informa ba ita-bót sira katak Primeiru Ministru husu mai ha’u atu fó atensaun liu ba iha diresaun autonómu sira, hodi akompaña nafatin sira-nia servisu hodi nune’e iha futuru instituisaun autonómu ne’ebé tuteladu Ministériu Justisa bele hamri’ik mesak ona,” hatutan Ministru Ivo Valente.

Oportunidade primeiru, Ministru Ivo fó tempu ba iha Diretór PSIK Sr. Vicente Fernandes e Brito. Diretór ne’e foufoun agradese ba Sr. Ministru Justisa tanba delega ona autonómu finanseira ba PSIK, esplika kooperasaun em assosiadu Interpol nian no servisu laboratóriu movél nian. Aliénde ne’e, nia esplika mós planu formasaun espesialista laboratóriu hosi Portugál, kustu viajem membru investigadór sira ba munisípiu sira, no seluk-seluk tán.

Depoiz aprezentasaun hosi PSIK, Ministru Ivo Valente loke ba feedback no sujestaun sira ne’ebé mai hosi Diretór-Jerál no diresaun sira seluk.

Hafoin ne’e, kontinua ho aprezentasaun servisu hosi Diretór Nasionál Rejistu Notariadu (DNRN) Sr. Vitor da Costa Neto, no tuir mai Diretór DNTP-SC Sr. Ramão Guterres, DNAJL, Centro Formação Jurídica (CFJ), DNDHC no Diretór DNAF Crisogno da Costa Neto ne’ebé aprezenta progressu ezekusaun orsamentu Ministériu Justisa nian.

Tuir relatóriu ezekusaun ne’ebé aprezenta hosi Diretór DNAF hatudu, ezekusaun orsamentu Ministériu Justisa nian iha loron 04 Maiu atinzi ona 44%, persentajem ne’e konklui ona ezekusaun atuál no komprimissu nian.

Reuniaun kuaze oras-hát ne’e remata iha tuku 12:00 meudia, Ministru Justisa enkoraja direjente sira atu kuidadu sasan Estadu nian, servisu ho profesionalizmu no melhora liután dezempeñu servisu nian.

“Bazeia ba ita-bót sira nia aprezentasaun ohin, ha’u foti konkluzaun katak, progressu ezekusaun la’o di’ak tebes, persentajem ezekusaun sa’e kompara ho fulan kotuk (Abril) maibé presiza hadia relatóriu narrativu tuir estandarte Dekretu-Lei nian, tenke submete relatóriu tuir tempu determinadu no servisu maka’as liután hodi nune’e hatudu katak hanesan funsionáriu públiku bele ona foti kna’ar tuir duni ita-bót sira nia kapasidade,” dehan Ministru Ivo Valente.

Marka prezensa iha reuniaun ne’e mak; Diretór-Jerál Henrique de Oliveira Ximenes, Inspetór GIA Lucas António da Costa, Diretór DNSPRS Helder Cosme Marçal Belo, Diretór DNHJL Nelinho Vital, Diretór PSIK Vicente Fernandes e Brito, Diretóra Interina CFJ Domingas Castanheiro, Diretór DNRN Vitor da Costa Neto, Diretór DNAF Crisogno da Costa Neto, Diretór DNTP-SC Romão Guterres, Diretór DNDHC Flaviano Moniz Leão, Xéfi Gabinete Ministru Justisa Evangelino Belo, direjente sira hosi Diresaun Jerál no assessor sira.