Dili 22 Abril, Ministériu Justisa hamutuk ho Gabinete Primeiru Ministru realiza Enkontru Grupu Traballu Tráfiku Umanu iha Salaun JL Vila.

Grupu ida-ne’e nu’udar fórum hodi koordena no akompaña kestaun sira kona-ba tráfiku umanu no fahe informasaun no dadus kona-ba kazu sira tráfiku umanu ne’ebé akontese iha Timor-Leste ka internasionál ne’ebé envolve sidadaun timoroan no sidadaun estranjeiru sira, haree liuliu ba labarik no feto no imigrante sira.

Objetivu enkontru ida-ne’e nian atu diskuti kona-ba Termu Referénsia Grupu nian no Planu Asaun Nasionál Kontra Tráfiku Umanu 2016 – 2018.

Molok realiza diskusaun Grupu, hala’o tiha aprezentasaun badak ida hosi Sr. Hendra IOM Indonézia nian ho tema Identifikasaun ba Vítima Tráfiku Umanu.

Aprezentasaun ida-ne’e foka ba oinsá halo identifikasaun ba vítima tráfiku umanu – labarik no ema boot – ho razaun katak identifikasaun ba vítima nu’udar prosesu ida-ne’ebé sensivel tebes presiza pesoál ne’ebé iha koñesimentu kle’an no abilidade atu manán informasaun no hametin nafatin vítima nia konfiansa.

Iha parte diskusaun ba Termu Referánsia (TOR) no Planu Asaun Anuál, membru sira hatudu partisipasaun ativa liuhosi hato’o sujestaun no krítika hirak ne’ebé ho objetivu atu hadi’ak substánsia TOR ba funsionamentu grupu nian no konteúdu Planu Asaun Nasionál nian atu sai realístiku liu haree ba kontestu timór nian.