MJ, PORTUGÁL – S.E. Ministru Justisa Ivo Valente nu’udar mós Prezidente ba Konferénsia Ministros da Justiça Paíz sira Lingua Ofisiál Portugés (CMJPLOP) hala’o vários trabalhos iha Lisboa-Portugál, hosi loron 18 to’o 21 fulan-Abril 2016.

Tuir mai ne’e, Mídia Gabinete Ministru hatu’un reportajem kompletu:

DIA 18 ABRIL 2016: REUNIAUN HO SEKRETÁRIU EZEKUTIVU CPLP IHA LISBOA

Ministru Justisa Ivo Valente ho kualidade hanesan Prezidente Konferénsia Ministros da Justiça Paíz sira Lingua Ofisiál Portugés (CMJPLOP) halo reuniaun ho Sekretáriu Ezekutivu CPLP Sr. Murade Murargi iha Palácio Conde de Penafiel, iha Lisboa - Portugál, loron Segunda-Feira (18/04/16).

Prezidente CMJPLOP Ivo Valente halo intervensaun kona-ba integrasaun Presidénsia Konferénsia ba Brazil iha tinan 2016 ne’e; inkluindu kestaun asunsaun presidénsia konferénsia ho nia funsionamentu no regras reuniaun sectorial ministru sira, atividade ne’ebé hala’o ona hosi Prezidente CMJPLOP no mós dezenvolvimentu relasaun CPLP nian ho Konferénsia Ministros Paíz Ibero-Americanos no Komisaun ASEAN nian iha Lisboa.

Hafoin reuniaun remata, Sekretáriu Ezekutivu Murade Murargi lori Prezidente Ivo Valente hodi hare’e besik funsionamentu edifísiu CPLP kada aulas servisu iha Palácio Conde de Penafiel.

REUNIAUN HO EMBASSADÓR FILIPINA IHA LISBOA

Prezidente CMJPLOP Ivo Valente hasoru malu ho Embassadór Filipina Phillipe J. Lhuillier iha Lisboa - Portugál, loron Segunda-Feira (18/04/16).

Prezidente CMJPLOP Ivo Valente iha reuniaun ne’e fahe informasaun ba malu kona-ba ezisténsia Timor-Leste no nia papel bainhira lidera Konferénsia Ministros da Justiça Paíz sira Lingua Ofisiál Portugés; inkluindu papel Konferénsia Ministros Justiça em relasaun ho dezenvolvimentu sosiál, ekonomia, justisa no komérsiu iha Paíz sira Lingua Ofisiál Portugés no dezenvolvimentu relasaun entre Konferénsia Ministros Justisa ho homóloga ASEAN nian.

Reuniaun ho karatér amizável ne’e, Sr. Embassadór Phillipe reprezenta Komisaun ASEAN iha Lisboa hato’o ninia prontidaun atu loke kontatu no relasaun maiz posivel ho CMJPLOP, liu-liu sei koalia ho nia Governu Filipinos hodi ajuda Governu Timor-Leste ba iha adesaun ASEAN.

Marka prezensa iha reuniaun ne’e mak; Sekretáriu Ezekutivu CMJPLOP Sr. Nelinho Vital, Embassadór CPLP Sr. Antonino de Araújo, Konsul Jenerál Filipinos Sr. Gines Jaime Ricardo Gallaga, Assessor Gabinete Ministru Justisa, no membru assessoria tékniku CPLP nian iha Lisboa.

DIA 21 ABRIL 2016: ASINA MEMORANDO DE INTENDIMENTO HO SEKRETÁRIU-JERÁL KONFERÉNSIA MINISTRU JUSTISA PAÍZ IBERO-AMERIKANOS (COMJIB)

Prezidente CMJPLOP Ivo Valente asina Memorando de Intendimento ho Sekretáriu-Jerál Konferénsia Ministru Justisa Justisa Paíz Ibero-Amerikanos (COMJIB) iha Portugál, loron Kinta-Feira ohin (21/04/16).

Prezidente Ivo Valente informa katak, “memorando de Intendimento ne’e nu’udar kontinuasaun hosi reuniaun dahuluk iha fulan-Setembru 2015 iha Sidade Madrid, España, no ohin, realiza ona komprimissu entre organizasaun internasionál CMJPLOP no COMJIB atu hadalan ba kooperasaun iha futuru paíz sira ne’ebé ho lian ofisiál Portugés no Espanhol.”

“Kooperasaun ida ne’e sei hametin liután lasu amizade entre organizasaun internasionál rua ne’e (CMJPLOP no COMJIB), nune’e iha biban barak ona hodi fó apoiu ba malu, partisipa iha konferénsia hamutuk, aprende no fahe kbiit ba malun liu hosi meius oin-oin, interkámbiu no fahe esperiénsia prátika di’ak sira iha kontextu dezenvolvimentu setór justisa nian,” hateten Ivo Valente.

VIZITA OFISIÁL BA INSTITUTO DOS REGISTOS E DO NOTARIADO PORTUGÁL

Ministru Justisa Ivo Valente halo vizita ba iha Instituto dos Registos e do Notariado (IRN) Ministériu Justisa Portugál nian iha Lisboa, loron Kinta-Feira (21/04/2016).

Iha vizita ne’e, Ministru Ivo Valente halo reuniaun ho Prezidente IRN Dr. José Ascenso Nunes da Maia hodi koalia kona-ba oinsá IRN Portugál hanesan instituto públiku presta nia servisu ba sidadaun no impreza sira iha ámbitu identifikasaun sívil no rejistu sívil, nasionalidade, prediál, komersial, bens móveis no pessoas koletiva.

Señor Ministru Ivo iha biban ne’e informa mós estajiáriu notáriu Diresaun Nasionál Rejistu Notariadu (DNRN) Ministériu Justisa nian ne’ebé mak sei mai iha Portugál iha fulan-Maiu 2016, hodi aprende prátika no servisu notáriu nian durante fulan hát nia laran.

Depois reuniaun, Ministru Ivo akompañadu hosi Prezidente IRN José Ascenso, halo mós vizita ba servisu atendimentu públiku iha Rejistu Notariadu,

MINISTRU IVO VALENTE SIMU ENTREVISTA HOSI AGÊNCIA DE NOTÍCIAS DE PORTUGAL IHA LISBOA

Ministru Justisa Señor Ivo Valente simu entrevista hosi Agência de Notícias de Portugal, SA – Lusa iha Campus da Justiça de Lisboa, Portugál, loron Kinta-Feira (21/04/2016).

Entrevista Ajénsia Lusa em relasaun ho vizita Ministru Justisa Ivo Valente iha Lisboa, inklui kualidade hanesan Prezidente Konferénsia Ministros da Justiça Paíz sira Lingua Ofisiál Portugés (CMJPLOP) kona-ba Reuniaun Konsellu Superiór Justisa no Pontu Kontatu Redi Judisiária CPLP hosi loron 19 áte 21 fulan-Abril 2016, futuru kooperasaun Timor-Leste ho Portugál, no mós esforsu Governu Timor-Leste iha reforma ba setór justisa nian.

Informasaun kompletu favór vizita iha: http://timoragora.blogspot.co.id/2016/04/portugal-preparado-para-fornece...

Akompaña Ministru Justisa Ivo Velente durante hala’o várias trabalho iha Lisboa, Portugál mak; Diretór-Jerál Ministériu Justisa Henrique de Oliveira Ximenes, Diretór Nasionál DNAJL Nelinho Vital, Assessor Jurídiku Gabinete Ministru Justisa João Pedro Campos no Assessor Komunikasaun Sosiál Joaozito Viana.

Maria de Lourdes Xavier Lin
Media Officer
Gabinete Ministru Justisa