MJ, PORTUGÁL – S.E. Ministru Justisa Timor-Leste Señor Ivo Valente ho kualidade hanesan Prezidente Konferénsia Ministros da Justiça Paíz sira Lingua Ofisiál Portugés (CMJPLOP) hato’o nia intervensaun iha serimónia abertura Reuniaun Primeira Konsellu Superiór Justisa Paíz CPLP, iha Salaun Nobre Tribunál Supremu Justisa Portugál, loron Tersa-Feira (19/04/16).

Reuniaun ne’ebé organiza hosi Konsellu Superiór Majistratura Portugal ho sesaun solene ne’ebé prezididu hosi Sua Excelência Prezidente República Portugál Señor Marcelo Rebelo de Sousa iha Edifísiu Tribunál Supremu Justisa Portugál, Praça do Comércio Lisboa.

Antes halo abertura, Prezidente CMJPLOP Ivo Valente fó ninia intervensaun kona-ba dezenvolvimentu setór justisa Estadu-Membru CPLP sira, esforsu sira ne’ebé mak hala’o ona, planu Konferénsia Ministru Justisa nian, apoiu membru, kooperasaun bilaterál entre Estadu-Membru no dezafiu sira iha futuru.

Nune’e mós hanesan Timor-Leste ne’ebé dadaun prezide konferénsia ne’e, Ivo Valente lori Governu no povu Timor-Leste hato’o ninia agradesimentu bót ba apoiu Estadu-Membru sira, liu-liu Portugál.

Reuniaun Primeira Konsellu Superiór Justisa Paíz CPLP ne’e hala’o durante loron-tolu (19-21/04/16) no konsege produz Deklarasaun Lisboa.

Deklarasaun Lisboa deside hodi estabelese Komisaun Permanente, no fó mandatu ba Konsellu Superiór Justisa Portugál hodi resebe membru Komisaun Permanente, no deside mós katak, mandatu Komisaun Permanente sei hakotu iha Primeiru Trimestre tinan 2017, no ikus, simeira ne’e sei hala’o ho rotativamente hosi paíz sira ne’ebé asina deklarasaun ne’e.

Simeira Konsellu Superiór Justisa Paíz CPLP tuir mai sei halo iha tinan 2018, sei halo apresiasaun ba normas no funsionamentu institusaun justisa sira, no diskute asuntu interese komum membru sira.

Partisipa iha Reuniaun Primeira Konsellu Superiór Justisa Paíz CPLP mai hosi Ministru Justisa sira ka nia reprezentasaun, no Konsellu Superiór Majistratura hosi paíz membru CPLP mak hanesan; Timor-Leste, Angola, Brasil, Cabo Verde, Guiné-Bissau, Moçambique, Portugal no São Tomé e Príncipe.