DÍLI-Ministériu Justisa (MJ)liu-hosi Diresaun Nasional Direitus Umanus no Cidadania (DNDHC) hala’o enkontru meja redonda hodi konsolida no valida dadus no informasaun kona-ba prosesu elaborasaun relatoriu Revizaun Periodiku Universal (RPU) ba segundu siklu ho instituisaun estadu sira, lina ministerial,Tribunal, sosidade sivil no ajensia internasional ONU, iha Centro Formasaun Juridika, loron 21 Abril 2016.

Timor-Leste nudar estadu parte ba ONU iha obrigasaun hodi hato’o relatoriu RPU. Relasiona ho ida ne’e, atribusaun DNDHC inklui elabora relatoriu tratadu internasional hotu-hotu ne’ebé Timor-Leste sai hanesan estadu parte ligadu ho direitus umanus.

Iha sesaun ne’e reprezenta Ministru Justisa hodi halo abertura hosi Sekretariu Estadu Terras no Propriedade, Jaime Xavier Lopes, iha nia intervensaun hatete, “tinan ne’e estadu Timor-Leste iha obrigasaun atu submete mudansa no dezafiu segundu siklu Revizasaun Periodiku Universal ba mundu internasional, ne’e pasu ida hodi rekola no valida prosesu relatoriu.”

Enkontru ne’e modera hosi Diretor DNDHC, Flaviano Moniz Leao.Prosesu ba sesaun ne’e iha aprezentasaun no intervensaun, apresentasaun halo hosi lina ministerial sira no tribunal bazea ba área tematiku hamutuk sanolu resin ida (11), mak hanesan 1. Justisa, 2. Justisa Tranzisionál, 3. Setór siguransa, 4. Violensia no Abuzu, 5. Protesaun Labarik, 6. Difisiênsia, 7. Moris iha nivel adekuadu, 8. Saude, 9. Edukasaun, 10. Servisu no 11. Trafiku umanu.
Instituisaun estadu no sosiedade sivil ne’ebé marka prezensa iha sesaun meja redonda mak hanesan Ministériu Edukasaun, Ministériu Defeza, Ministériu Soslidaridade Sosial, Ministériu Negosiu Estranzeiru, Ministériu saude,SEM Sekretariu Estadu Juventude no Desportu, PDHJ, PNTL, Asosiasaun Difisiênsia Timor-Leste, JSMP, AJAR, FM, ETBU, KATILOSA, KSTL, AHDMIL, FOKUPERS, inklui ekipa Ministeriu Justisa hosi DNAJL, CFJ no DNRN. (C)