ERMERA,DNDHC – Ministériu Justisa liu hosi Diresaun Nasionál Direitus Umanus no Sidadania (DNDHC) hala’o programa Sosializasaun ba Rekomendasaun Konvensaun Direitu Labarik nian iha Munisípiu Ermera, loron 11-13 fulan-Abril 2016.

Sosializasaun ba Rekomendasaun Komité Direitu Labarik hosi Jenebra nu’udar obrigasaun Timor-Leste hanesan Estadu-Parte ba Konvensaun Direitu Labarik (KDL), aliénde ne’e, fó hatene ba komunidade no autoridade lokál sira kona-ba saída de’it mak Timor-Leste tenke kumpri hodi hadia situasaun labarik iha Timor-Leste.

Iha sosializasaun ne’e, Xéfi Departementu Tratadus no Monitorização Ministériu Justisa Sr. Helder Godinho Martins, esplika kona-ba prosesu Preparasaun ba relatóriu KDL, estabelesimentu pontu fokál liña-ministeriál no Munisípiu, nomeasaun entitade Estadu nu’udar responsável atu koordena no prepara relatóriu KDL, no kooperasaun entre Komisaun Nasionál Direitu ba Labarik hodi fó apoiu ba DNDHC, diskusaun relatóriu iha Konsellu Ministru, no mós prosesu preparasaun no submisaun relatóriu ba Komité Direitu Labarik iha Jenebra.

Nune’e mós, Sr. Helder aprezenta rekomendasaun hosi Komité Direitu Labarik nian no saída de’it mak Estadu tenke kumpri, iha polítika ka foti desizaun no planu hodi defende, proteje no hakonu direitu labarik idak-idak iha Timor-Leste.
Iha sorin seluk, Tékniku Profisionál DNDHC Sra. Octavia Lopes Lemos mós aprezenta kona-ba Konvensaun Direitu Labarik em relasaun ho ba papel inan-aman, profesores no sosiedade atu proteje no defende direitu labarik sira.

Komisaun Nasionál Direitu Labarik ne’ebe reprezenta hosi Sra. Madalena Guterres Correia iha oportunidade ida ne’e koalia kona-ba; medidas jerál husi Rekomendasaun ne’ebe rekomenda ba Estadu Timor Leste atu implementasaun Konvensaun Direitu Labarik,(KDL) nia prinsípiu sira kona-ba direitu sívil, liberdade, fenómenu violénsia hasoru labarik sira, importansia ámbiente família no kuidadadus alternativas.

Sra. Madalena haktuir katak, “Timor-Leste iha obrigasaun atu implementa rekomendasaun Konvensaun Nasõens Unidas ba Direitu Labarik hosi Jenebra; importante ba labarik sira mak tenke hetan saúde bazika, edukasaun, bem-estar, tempu hodi goja ka halimar, tuir atividade kulturál no hetan medidas espesiál ba protesaun.”

Programa sosializasaun ne’e partisipa hosi; Conviocsões Relisiosos, Professor sira, PNTL, estudante Uiversitario, Estudante Secundario, Sosiedade Sívil, inan-aman, Autoridade Local, Juventude, Animadores Sosiais, Representante Feto no populasaun sira.