DÍLI-Sekretáriu Estadu Terras Propriedades (SETP) Jaime Xavier Lopes hamutuk ho Administradór inlkui mós Diretor no Xefe Departementu iha Ambitu Terras Propriedades iha loron 12 fulan-Abríl 2016 foinlalais ne’e hala’o senseblizasaun ba komunidade sira iha Tasi-Tolu postu administrativu Dom Aleixo Munisipiu Díli.

Sekretáriu Estadu ne’e hateten, maske oras ne’e lei rai nian seidauk iha maibé bainhira uza diadi’ak liafuan ukun-rasik-an problema rai sei menus iha teritoriu Timór-Leste, tanba liafuan ukun-an hatudu ba ema idaidak atu bele ukun sasan ne’ebé maka sira nian hodi labele ba ukun no okupa ema seuluk nia sasan no ema seluk nia hela fatin.

Tanba ne’e iha senseblizasaun ba dahuluk iha postu administrativu dom aleixo nia ne’e nia husu ba komunidade sira ne’ebé maka okupa ema seluk nia helafatin no rai abandonadu ne’ebé maka konsidera estadu nian tenki ba hato’o iha terras propriedade hodi bele halo kontratu arrendamentu ho estadu.

Nia hateten haree ba liafuan nee iha dili hatudu katak komunidade sira barak maka sei okupa rai no uma estadu nian, tanba ne’e husu ba komunidade sira atu bele tau ba rezistu iha terras propriedades hodi bele halo kontratu arrendamentu.

Iha biban ne’e SETP mensiona mós kona-bá artigu 54 konstituisaun RDTL nian ne’ebé maka ko’alia kona-bá direitu ba propriedade privada, hanesan iha sesaun dahuluk ba artigu ne’e nian hateten, ema hotu-hotu iha direitu ba propriedade privada, no bele fó ba ema seluk wainhira sei moris nomós wainhira mate tuir lei nia lala’ok.

Maske iha sesaun ba artigu 54 hateten hanesan ne’e maibé la’ós atu lori artigu ne’e hodi okupa ema seluk nia sasan no ema seluk nia hela fatin, tanba iha lei hakerek.

Iha sesaun daruak hosi artigu 54 nian mós hateten, labele uza fali propriedade privada hodi estraga fali ninia funsaun sosiál, iha sesaun ida ne’e fó hanoin ba sidadaun hotu ne’ebé maka iha rai luan hodi bele kuda netik buat ruma iha rai nia laran hodi labele halakon rai nia funsaun social, bainhira rai mamuk to’o tempu ruma estadu presiza ba intrese ema hotu nian estadu sei foti.

Iha senseblizasaun ne’ebé maka hetan partisipasaun masimu hosi komunidade sira inklui mós hosi parte seguransa no defeza inklui mós Teknkniku Terras Propriedade nian ne’e nia esplika mós sesaun datoluk hosi artigu 54 nian ne’ebé hateten atu hetan eh hasai ema ida nia propriedade privada hodi halo ba uzu públiku, tenke selu indiminizasaun loloos ba sidadaun tuir lei haruka, iha sesaun ne’e fohanoin ba sidadaun sira bainhira estadu presiza rai ruma ba intrese ema hotu nian estadu sei foti maibé sei fó indiminizasaun tuir lei haruka.

Antes fó indeminizasaun, tuir SETP, rai-nain tenki iha dokumentus komporativu ruma ne’ebé hatudu katak, rai ne’e ninian eh tenki iha sasain ruma ne’ebé maka hatene hitoria rai nian, tanba kompenizasaun sei la fó arbiru ba komunidade sira bainhira dokumentus rai nia laloos.

Jaime hateten, antes okupa tenki husu lai ba iha diresaun terras propriedades hodi labele mosu dezentendementu entre komunidade ho komunidade, nune’e m’os entre komunidade ho estadu.

Iha artigu 58 koalia kona-ba hela fatin, no iha artigu ne’e hateten Ema hotu iha direitu ba nia an, nia família atu iha uma ida ho nia dimensaun no kondisaun di’ak, moos no konfortu atu bele iha intimidade ba ema idaidak no privasidade familiár.

Hosi artigu ne’e atu fó hanoin ba komunidade sira, liu-liu ba familia kbiit laek hodi bele hetan mós hela fatin hanesan komunidade bain-bain, hosi artigu ne’e mós sai hanesan politika governu nian ida iha futuru mai hodi bele kria uma ruma ba komunidade sira.

Eis Diretór Terras Propreidade ne’e husu ba komunidade sira hodi bele utiliza komunidade sira nia rai ho diak hodi labele halakon ninia funsaun sosiál, bainhira la utiliza ho diak, estadu sei uza artigu 141 konsituisaun RDTL nian ne’ebé ko’alia kona-bá rai no artigu ne’e hateten Lei mak regula propriedade, nia uzu no utilidade rai nian, hanesan fatór produsaun ekonómiku ida.

Jaime mós husu ba komunidade sira neebe maka iha dili hodi bele utiliza didiak sira nia rai neebe maka iha foho hodi kuda ai horis ruma.

Iha biban nee SETP ko’alia mós kona-bá Lei Nú. 1/2003 nian ne’ebé maka hateten, rai no sira ne’ebé maka estadu portugés no indonesia hosik hela Provizoriamente estadu Timór-Leste liu hosi Terras Propriedades maka administra.

Iha fatin hanesan Administradór Munisipiu Díli Gaspar Soares husu ba komunidade sira ne’ebé maka partisipa iha senseblizasaun ne’e atu rona diadi’ak saida maka hato’o hosi SETP hodi labele okupa ema nia rai tuir hakarak, nune’e mós husu ba komunidade sira atu bele hato’o sira nia prekupasaun ne’ebé maka durante ne’e sai hanesan dúvidas iha komunidade nia leet.

Durante sebseblizasaun iha Tasi-Tolu komunidade sira prekupa liu kona-bá oinsa maka atu hetan legalidade ba sira nia okupasaun, nune’e mós ba komunidade sira neebe maka okupa rai no uma estadu nian ho ni adurasaun to’o tinan hira maka bele sai nain.*