DÍLI, PN – S.E. Ministru Justisa Ivo Valente informa katak, Proposta Projetu Lei Prosedimentu Konsesaun Indultu aprova ona iha diskusaun espesialidade no votasaun finál globál ne’ebé prezide hosi S.E. Prezidente Parlamentu Nasionál (PN) Interinu Adriano do Nascimento iha Plenária PN, iha Díli, loron Segunda-Feira (11/04/16).

Haktuir prosesu diskusaun durante loron tomak iha plenária, Meza Parlamentu Nasionál simu proposta hat (4), proposta sira ne’e em relasaun ho mudansa ba titúlu proposta lei, epígrafia uzu termu efeitu hosi indultu, artigu foun no redasaun foun ba artigu trés (3) nian.

Diskusaun espesialidade hahú ho titúlu lei ne’e, tuir intervensaun Ministru Justisa katak, “proposta distintu deputado sira ba iha mudansa titúlu pertinente tebes, hodi háluan liután titúlu lei nune’e atu kobre kestaun indultu no comutação de pena, maibé iha nia aplikasaun no prosedimentu hanesan nafatin bainhira Prezidente hili atu fó indultu ka komutasaun pena.”

Hanesan mós proposta membru PN kona-ba epígrafia uzu termu, hámosu artigu foun no mudansa redasaun lei nian; Ministru Justisa fó nia esplikasaun jurídiku em relasaun ho konstitusionalidade no haktuir Kódigu Prosesu Penál, no sujere bele halo mudansa maibé importante mak laiha efeitu ba prinsípiu moção de pena no presiza ajustada ho termu téknika jurídika nian.

Diskusaun espesialidade la’o di’ak tebes, ponto de vista oin-oin mosu hosi deputado sira kona-ba kestaun definisaun, termu jurídiku no efeitu lei ne’e iha tempu oin mai.

“Proposta lei ne’ebé ohin diskute aprova tiha ona, aprovasaun finál globál Proposta Projetu Lei N.º 30/III (3a) ne’e inklui ona ho nia mudansa ba textu balun, no konkorda hamutuk (lee: Governu ho Parlamentu Nasionál) atu halo harmonizasaun ba redasaun antes proposta lei ne’e entrega ba iha Sua Excia. Prezidente-Repúblika hodi hare’e, tétu no promulga,” informa Ministru Ivo Valente bainhira remata plenária diskusaun espesialidade ba Mídia Gabinete Ministru Justisa.

Proposta projetu lei ne’e, aprova ho afavór 46 vótu deputadu sira, laiha vótu kontra no abstensaun.

Akompaña Ministru Justisa iha plenária ne’e mak; Diretór DNAJL Nelinho Vital, Diretór DNSPRS Heldes Cosme Marçal Belo, Assessór Jurídika Ministru Justisa João Pedro Campos no Tradutór Jurídika DNAJL Paulo Henriques.