DÍLI, CFJ– S.E. Ministru Justisa Ivo Valente ne’ebé akompañadu hosi Diretóra-Jerál Funsaun Públika, Sekretáriu Estadu Terras no Propriedade Jaime Xavier Lopes no Diretór-Jerál Ministériu Justisa Henrique de Oliveira Ximenes fó-posse ba kargu xéfia diresaun sira no entrega sertifikadu pensõens ba pensionista funsionáriu hamutuk ema nain-hát iha Aula Konferénsia Centro Formação Jurídica (CFJ) Kaikoli, Díli, loron Sexta-Feira (08/04/16).

Tomada de posse ne’e halo ba empossadu hamutuk nain sanulu-resin lima (15), kompostu hosi kargu xéfia diresaun sira iha ámbitu Ministériu Justisa kompostu hosi; Direitór Nasionál ema nain-tolu (3), Diretór Munisípiu hamutuk ema nain-tolu (3) no Xéfi Departementu hamutuk ema nain-sía (9) mak hanesan; Amândio Alves Gomes, Francisco Ribeiro Borges Martins, Francisco Mouzinho Amaral, Francisco de Deus, Helder Godinho Martins, Helder Cosme Marçal Belo, Inocêncio José Alves, Justo Lafo, Marcelina Tilman da Silva, Marino Corte-Real, Mateus Ramos Pereira, Nelinho Vital no Zenoveva Xavier Correia.

Iha ninia diskursu depois fó-posse, Ministru Ivo Valente felisita nia parabéns ba empossadu sira ho nia família ne’ebé mak durante ne’e fó apoiu, no deseju atu empeña nafatin nia dedikasaun no profesionalismu iha servisu.

“Ohin imi simu ona posse, parabéns ba imi-hotu no família empossadu sira, sucsesso imi-nia konta mós sucsesso ba imi-nia família. Ha’u hakarak fó korajem nafatin ba imi hodi imi bele ajuda malu iha servisu, tenke hala’o servisu no ezerse ho profisionálismu, fó prestasaun ba imi-nia funsaun, tanba sei iha oportunidade hodi hetan avaliasaun prestasaun hosi Funsaun Públika iha tinan oin mai, evaluasaun laós mai de’it hosi imi-nia superiór maibé mai mós hosi públiku, ita-nia povu mós foti papel iha evaluasaun ba imi-nia kna’ar loron-loron nian. No hau fiar katak, imi, ho apoiu hosi imi-nia família servisu hotu sei la’o di’ak nafatin,” hateten Ministru Ivo Valente.

Ministru Ivo Valente hatutan, “Administrasaun públika sei funsiona nafatin to’o bainhira de’it, polítika bele muda, ema mós bele muda maibé administrasaun públika sei la’o nafatin no tenke metin iha nia profisionalismu, tenke metin ho kapasidade téknika, no ha’u fiar ho ita-bo’ot sira nia apoiu – Diretór Jerál, diretór sira no xéfi departementu sira hotu sei hametin nafatin administrasaun públika, liu-liu iha Ministériu Justisa.”

Iha biban ida ne’e, Ministru Justisa entrega mós sertifikadu pensõens ba pensionista funsionáriu Ministériu Justisa hamutuk ema nain-hát (4), ne’ebé tama ona iha idade reforma. Ministru Ivo Valente bainhira entrega sertifikadu hato’o mós nia agradesimentu bo’ot ba pensionista sira, tanba ezerse ona nia papel hamutuk ho Ministériu Justisa iha tinan barak nia laran.

Partisipa iha serimónia tomada de posse ne’e mak; Inspetór-Jerál Estadu Francisco de Carvalho, Defensór-Públiku Jeral Sérgio de Jesus Hornai, Komandante PNTL Komisáriu Julio da Costa Hornai, Inspetór-Jerál Ministériu Justisa Lucas António da Costa, Reprezentante PDHJ; diretór nasionais, xéfi departementu no diretór munisípiu sira iha ámbitu Ministériu Justisa, Xéfi Gabinete Ministru Justisa Evangelino Belo, Assessor Ministru Justisa, mídia, família empossadu sira no funsionáriu sira hosi Ministériu Justisa.