DÍLI, CFJ – S.E. Ministru Justisa Ivo Valente prezide reuniaun Konsellu Superiór Polísia Sientífiku Investigasaun Kriminál (PSIK) iha Sala Reuniaun Ministru Justisa, iha Díli, loron Segunda-Feira (11/04/16).

Reuniaun Fechada ho ajenda; rona aktualizasaun servisu no funsionamentu PSIK nian, nomeasaun Adjuntu-Diretór PSIK, re-abertura vagas 30 peskizadór PSIK no seluk-seluk tán.

Iha prosesu diskusaun, Ministru Ivo Valente hanesan mós Prezidente Konsellu Superiór PSIK hamutuk ho Konseleiru sira deside hosi nomeia membru PSIK nia ema ida nu’udar Adjunto-Diretór; tanba presiza halo promusaun hosi intituisaun PSIK nia laran, aliénde nia hatene dezenvolvimentu PSIK, iha oportunidade sedu ba promusaun tanba priense ona perfil ba servisu profisionalismu nian, konfiansa no lealdade.

Relasaun ho vaga foun 30 peskizadór PSIK, iha reuniaun ne’e Konseleiru sira deside atu re-abertura rekrutamentu.

Konseleiru Longuinhos Monteiro, nu’udar mós Ministru Interiór iha ninia intervensaun enkoraja membru PSIK atu kolabora nafatin ho PNTL iha servisu ezekusaun mandatu judisiál no investigasaun nian, hodi kontra rezisténsia ba krimi sira mak akontese iha ita-nia rain.

Marka prezensa iha reuniaun ne’e mak, membru Konsellu Superiór PSIK sira mak hanesan; Ministru Justisa Ivo Valente (Prezide), Ministru Interiór Dr. Longuinhos Monteiro no Ministru Defeza Dr. Cirilio Cristovão, Diretór Nasionál PSIK Dr. Vicente Fernande e Brito no Xéfi Departementu sira iha ámbitu PSIK.