DÍLI, CFJ - S.E.Ministru Justisa Ivo Valente ho kualidade hanesan Prezidente Konsellu Jerál Centro Formação Jurídica (CFJ) halo reuniaun urjenti ida ho membru Konsellu Jerál CFJ hodi diskute funsionamentu Centro Formação Jurídica ba formasaun majistradu no defensór públiku, prosesu rekrutamentu formadór internasionál no halo planu implementasaun ba protókolu kooperasaun setór justisa ne’ebé halo ona entre Timor-Leste ho Portugál iha Aula Reuniaun CFJ Kaikoli, Díli, loron Kinta-Feira (07/04/16).

Iha biban ida ne’e, Prezidente Konsellu Jerál Ivo Valente informa mós ba konseleiru sira kona-ba apoiu Portugál nian ba Timor-Leste; inkluindu ajudu kapasitasaun majistradu sira mai hosi Governu Amérika liu hosi ninia Embaixada iha Timor-Leste, no apoiu balun tán hosi ajénsia internasionál iha área formasaun espesífiku (Ezemplu: krimi transnasionál sira).

“Ministra Justisa Portugál ho ha’u asina ona protókolu kooperasaun iha loron 25 fulan-Fevereiru 2016 liubá iha Lisboa, iha ne’ebá, ha’u koalia ho Señora Ministra Francisca Van Dunem atu apoiu Timor-Leste, no nia prontu atu fó apoiu mai ita iha área justisa. Recepção calorosa, Portugál hatudu sira nia boa-vontade bót teb-tebes, sira akompaña ita-nia dezenvolvimentu justisa no kompremente atu fó apoiu nafatin mai iha Timor-Leste,” informa Ministru Ivo Valente.

Relasaun ho Portugál no paíz CPLP sira seluk hodi haruka sira-nia inspetór no juíz ka formadór sira mai iha Timor-Leste, Prezidente Tribunál Rekursu Interina Juíza Maria Natércia husu atu haruka formadór sira ne’ebé iha esperiénsia minimu tinan ualu, nune’e Timor-oan bele aprende no absorve esperiénsia sira, tanba mós funsionamentu Tribunál sai atensaun ema hotu-hotu, ita hakarak formadór sira kapasidade di’ak no méritu duni.

Iha fatin hanesan, Procurador-Geral da República José da Costa Ximenes hato’o mós katak, presiza iha planu rezerva kuandu formadór sira mai tarde ka la-mai, tanba ita presiza tebes funsionamentu CFJ la’o, ita iha nesesidade urjenti ba majistradu foun sira.

Depois-de diskute kona-ba formadór internasionál, konseleiru sira mós diskute matéria formasaun. Aliénde ne’e, diskute mós 40 ofisiais justisa foun sira hosi Tribunál Rekursu ne’ebé mak sei tuir formasaun iha CFJ, no formasaun komplementár ba juíz no defensoria públiku iha tempu ferias judisiáriu nian iha fulan-Agusto no fulan-Setembru nia laran.

Reuniaun Konsellu Jerál Centro Formação Jurídica ne’e partisipa hosi konseleiru sira mak hanesan; Ministru Justisa Ivo Valente (prezide), Prezidente Interina Tribunal Recurso Juíza Konseleira Maria Natércia, Procurador-Geral da República José da Costa Ximenes, Defensór Público Geral Sergio de Jesus Hornai, Prezidente Conselho do Gestão e Disciplina da Advocacia Nelinho Vital no Directora do CFJ Marcelina Tilman da Silva.