DÍLI, CFJ – S.E. Ministru Justisa Ivo Valente reprezenta Sua Excia. Primeiru-Ministru RDTL Rui Maria de Araújo hamutuk ho Xéfi Misaun IOM Sr. Bruno Maltoni no Embaixadóra EU iha Timor-Leste Sra. Karen Stanton halo lansamentu ba Grupu Traballu Inter-Ajénsia Tráfiku Umanu iha Sala Konferénsia Centro Formação Jurídica (CFJ) Ministériu Justisa iha Kaikoli Dili, loron Kinta-Feira (07/04/16).

Grupu Traballu Inter-Ajénsia Tráfiku Umanu ne’e lidera hosi Gabinete Primeiru-Ministru, manifesta komprimissu Governu Timor-Leste hodi kombate tráfiku umanu hasoru mane, feto ka labarik sira ne’ebé sujeita ba iha tráfiku seksuál no traballu forsadu.

Iha ninia intervensaun bainhira halo lansamentu ba Grupu Traballu Ministru Ivo Valente ne’ebé lori mensajem Primeiru-Ministru nian hateten, “kazu krimi tráfiku umanu akontese barak ona iha Timor-Leste, por ezemplu; iha tinan 2015, tuir relatóriu investigasaun Ministériu Públiku no PNTL investiga ona kazu 8 ne’ebé deskonfia krimi tráfiku umanu. Tanba-ne’e, ita presiza servisu maka’as liután atu nune’e bele proteje ita-nia jerasaun foun sira; liu-liu sira ne’ebé vulnerável hanesan ita-nia alin, oan, feton no subriña sira hosi ema sira ne’ebé komete eskravidaun modernu.”

“Governu konsiente katak, atu kombate krimi tráfiku umanu, meius ida mak liu hosi Konsellu Ministru aprova ona Lei Kombate Tráfiku Umanu iha tinan 2014, no haruka ona ba iha Parlamentu Nasionál atu diskute klean no aprova, sei haruka ba iha Sua Excia. Prezidente-Repúblika hodi promulga,” hateten Ministru Ivo.

Iha biban ne’e, Ministru Ivo esplika mós komitmentu Governu Timor-Leste hodi kombate krimi tráfiku umanu iha Timor-Leste, nia husu mós ba Grupu Traballu atu aprende hosi dezafiu iha pasadu atu garante sustentabilidade grupu ne’e.

“Grupu Traballu Inter-Ajénsia Tráfiku Umanu hatudu komprimissu Governu nian hodi involve liña ministeriál no ONG sira atu renova Planu Asaun Nasionál tinan 2016-2018 antes aprova, sei servisu tuir termu referénsia no kódigu konduta grupu nian hodi kombate tráfiku umanu iha Timor-Leste, no grupu ne’e tenke servisu maka’as liután atu proteje jerasaun foun sira” apela Ministru Ivo.

Iha oportunidade ida ne’e mós Xéfi Misaun IOM no Embaixadóra EU iha Timor-Leste hato’o mós efeitu negativu hosi krimi tráfiku umanu iha mundu, rezultadu relatóriu vítima tráfiku umanu iha rai seluk, área sira ne’ebé frajil ba umanu tráfiku no sira nia komprimissu atu apoiu fundus ba Governu Timor-Leste no ONG sira, inklui meius kapasitasaun ba Timor-oan sira.

“Governu Estadus Unidus Amérika kongratula Governu Timor-Leste ba Planu Asaun Nasionál Kombate Tráfiku Umanu, servisu ne’e sei atinzi kuandu servisu hamutuk ho komunidade sira no sosiedade sívil, presiza involve sira hosi luta hasoru tráfiku umanu,” dehan Embaixadóra EU Karen Stanton iha ninia intervensaun.

Marka prezensa iha lansamentu ne’e; ofisiál Governu liña ministériu sira, pontu fokál kombate tráfiku umanu, Defensór Públiku-Jerál, diretór nasionais iha ámbitu Ministériu Justisa, Membru ONG nasionál no ajénsia internasionál sira.