DÍLI-Sekretáriu Estadu Terras Propriedades (SETP) Jaime Xavier Lopes iha loron 4 fulan-Abríl 2016 foin lalas ne’e hala’o enkontru ho Diretór Nasionál Terras Propriedades inklui mós diretór Terras Munisipiu Díli nian no Xefe Departementu ámbitu SETP nian hodi ko’alia kona-ba lei rai nian ne’ebé maka aprova ona iha Konsellu Ministru no oinsa maka atu halo avaliasaun ba kustu arrendamentu nian iha futuru.

Iha biban ne’e SETP informa ba iha ninia kargu Xefia sira katak, lei tolu ne’ebé aprova ona iha konsellu ministru maka hanesan lei espropriesaun, fundu finanseiru mobiliaru no proprosta lei kona-ba Rejime Espesiál ba definisaun Titularidade bens imóveis nian.

Maibé antes aprova proposta lei tolu ne’e iha konsellu ministru, preside hodi anula kapitulu ne’ebé ko’alia kona-ba despezu administrativu nian,maibé kapitlu refere Ministériu Justisa sei kria fali diploma ministerial nian, kapitlu refere hasai hosi proposta lei ne’e tanba tuir SETP la kondis ho situsaun iha rai laran.

Iha biban ne’e nia mós orienta ba iha kargu xefia sira hodi tuun ba baze hodi bele halo peskiza kona-bá rendementu ba ema sira ne’ebé aluga fatin estadu nian hodi bele halo avaliasaun ba kustu arendamentu nian.

Nia mós hateten, antes atu hasa’e kustu arrendamentu ba iha arrendatariu sira ekipa tékniku terras nian tenki haree uluk kondisaun real iha fatin ne’ebé maka halo renda ho estadu, nune’e mós sira ne’ebé maka halo arrendamentu ho estadu hodi loke negosiu ninia presentazen tenki aumenta tuir lokalizasaun fatin nune’e mós tuir rendementu ne’ebé maka nia hetan.

Nia mós husu kargu xefia sira bainhira hala’o servisu tenki tuir orden hodi bele atende komunidade sira ho di’ak no dignu.
Nia husu ba diretor no xefe Departementu sira hodi bele fo atendementu ne’ebé di’ak ba iha komunidade sira ne’ebé maka hakarak trata sira nia dokumentus ruma kona-bá rai nian.

Iha enkontru ne’ebé hala’o durante oras rua nia laran ne’e Sekretáriu Estadu ne’e husu mós ba iha Diretór nia xefe Departementu sira hodi bele fó hanoin ba funsionáriu sira hodi bele entrega servisu ba funsionariu seluk antes iha lisensa annuál.*