DÍLI, MJ – S.E. Ministru Justisa Ivo Valente prezide reuniaun regulár Konsellu Konsultivu Ministériu Justisa iha Aula Reuniaun Ministériu Justisa, iha Díli, loron Segunda-Feira (04/04/16).

Reuniaun Konsellu Konsultivu ne’ebé involve Diretór-Jerál, Inspetór-Jerál no Diretór Nasionál sira iha ámbitu Ministériu Justisa; hodi diskute progressu ezekusaun atividade ho ninia dezafiu sira, aktualiza mós nível ezekusaun orsamentu trimestre primeiru nian (hosi Janeiru to’o Marsu 2016) no planu ezekusaun ba fulan-Abril 2016 nian.

Iha nia lian makloke, Ministru Ivo hateten, “ha’u hakarak kongratula señor diretór sira-hotu, tanba ita-bót sira nia esforsu, ita konsege atinzi ezekusaun programa no orsamentu to’o 25% iha trimestre primeiru, hanesan mós Konsellu Ministru fó sira-nia apresiasaun ba Ministériu Justisa nia servisu, ha’u orgullu ho ita-bót sira hotu.”

“Reuniaun ohin ne’e, ita-hotu atu aktualiza servisu ne’ebé de’it mak ita hala’o ona, no ha’u husu ita-bót sira aprezenta atividade prisinsipál semana oin nian, no fulan-Abril ne’e nia laran, saída de’it mak ita-nia prioridades,“ hateten Ministru Ivo.

Depois abertura reuniaun, Ministru Justisa fó tempu ba Diretór idak-idak hodi aprezenta ninia servisu iha diresaun ne’ebé nia haksumik bá. Diretór idak-idak halo aprezentasaun ba servisu saída mak hala’o ona iha fulan-Marsu, no planu servisu iha fulan-Abril ne’e nia laran.

Kada aprezentasaun hosi diretór sira, Ministru Ivo sempre loke oportunidade ba diresaun sira seluk atu fó sira nia idéias no feedback nu’udar jestu apoiu malu hodi melhora di’ak liután servisu diresaun idak-idak.

Marka prezensa iha reuniaun ne’e mak; Diretór-Jerál Henrique de Oliveira Ximenes, Inspetór-Jerál Lucas António da Costa, Sub-Inpetór sira, Diretór DNSPRS Helder Cosme Marçal Belo, Diretór DNHJL Nelinho Vital, Diretóra CFJ Marcelina Tilman, Diretór DNRN Vitor da Costa Neto, Diretór DNAF Dr. Crisogno da Costa Neto, Diretór DNTP-SC Romão Guterres, Diretór DNDHC Flaviano Moniz Leão, Xéfi Gabinete Ministru Justisa Evangelino Belo, direjente sira hosi Diresaun Jerál no assessor sira.