DILI-Ministru Justisa Interino Atuál Sekretáriu Estadu Terras Propriedade (SETP) Jaime Xaveir Lopes iha loron 18 fulan-Marsu 2016 foin lalais ne’e assina eskritura públika kona-ba direitu superfísie ho Santa-Sé ne’ebé reprezenta hosi Núnsiu Apostóliku ba Santa Sé Mgr. Joseph Marino, ne’e asiste hosi Sekretáriu ba Núnsiu Apostóliku iha Timór-Leste bispo Dioseze Díli no Baucau ne’e hala’o iha salaun Very Important Person (VIP) Ministériu Negosiu Estranjeiru e Coperasaun Díli Timór-Leste.

Asina Eskritura Públiku ne’ebé partisipa hosi Diretór Jerál Ministériu Justisa inklui mós protokolu MNEC nian ne’e hahú iha oras tuku 9:30 dadeer.
Hafoin parte rua asina eskritura públiku ne’ebé prepara hosi Notaris Minitériu Justisa nian, SETP hateten ne’e hanesan akordu ida ne’ebé maka antes ne’e Primeriu Ministru RDTL Rui Maria de Araujo hala’o ona iha Roma Italia.

Iha biban ne’e Ministru Justisa ne’ebé atuál Sekretáriu Estadu Terras Propriedades nian ne’e hateten, asinatura ba eskritura públika nian ne’ebé hala’o iha Timór-Leste ne’e bazeia ba despasu Ministru Justisa nian ho númeru 16/GM/MJ/III/2016, ho delegasaun kompetensia ne’ebé hahuu hala’o iha loron 11 fulan-Marsu 2016 tuir rezolusaun Governu Timór-Leste númeru 18/2015, 25 fulan-Abríl.

Tanba ne’e lori estadu Timór-Leste nia naran ho konsiente tomak hakarak entrega rai ne’ebé no nia luan 10.020 kuadradu, ne’ebé lokaliza iha alideia Lirio Suku Motael Munisipiu Díli ba iha Santa Sé tuir akordu ne’ebé maka iha.

Jaime hateten, estadu Timór-Leste liu hosi Ministériu Justisa hala’o asina eskritua públiku ne’e tanba iha loron 14 fulan-Agostu 2015 tinan kotuk governu Timór-Leste halo ona konkordansia ida ho Santa Sé, nune’e mós iha loron 3 fulan Marsu 2016 foin lalais ne’e, Primeiru Ministru RDTL, Rui Maria de Araujo ho nia kometiva hala’o vizita servisu nian ida ba iha Vatikanu hodi realiza akordu legál ida entre estadu Timór-Leste ho Vatikanu.

Rai ne’ebé Governu Timór-Leste liu hosi Terras Propriedade Minitériu Justisa nian entrega ba Santa Sé ne’e kada tinan simbolikamente sei selu ho folin US$ 120,00 ba estadu Timor-Leste liuhosi Diresaun Nasional Terras Propriedades.

Iha biban ne’e Mgr. Joseph Marino hanesan Núnsiu Apostóliku da Santa Sé iha Timor-Leste, hateten, nia parte sente kontente ho fatin ne’ebé maka estadu Timor-Leste entrega ba Santa Sé, nune’e hodi bele harí edifisiu Núnsiatura Santa Sé nian iha Timor-Leste.

Joseph hateten, ho edifisiu nuúnsiatura Santa Sé nian ne’ebé maka iha tempu badak sei harí iha Timór-Leste ne’e hanesan parte ida atu illas Papa nian bele mós hakbesik-an ba srani katóliku timor oan sira.*