DILI, GMJ – S.E. Ministru Justisa hala’o reuniaun ho the Asian Development Bank liu hosi nia Country Coordinator Inisiativa ba Dezenvolvimentu Setór Privadu (PSDI) Sra. Joana Custóis no Konsultór PSDI-ADB Sr. Ignacio Tirado kona-ba reforma iha setór insolvénsia, iha Gabinete Ministru Justisa, Dili, loron Kinta-Feira (10/03).

Reuniaun kuaze oras-ida ne’e, parte ADB nian fahe informasaun kona-ba setór prinsipál mak sei hasoru insolvénsia iha futuru, meius apoiu ADB ba Governu Timor-Leste, no diskute mós estabelesimentu kooperasaun no apoiu tékniku jurídiku hosi ADB ba Ministériu Justisa iha futuru.

Ministru Justisa espressa ninia gratidaun ba ADB ne’ebé hakarak oferese asisténsia tékniku ba Ministériu Justisa iha futuru mai.

“Ha’u agradese tebes ba apoiu ne’e, ha’u sei koalia ho Terras no Propriedades ba área ne’ebé mak presiza hetan apoiu hosi ADB, ha’u sei lori mós ba iha reuniaun Konsellu Koordenasaun Setór Justisa nian hodi rona mós konseleiru sira-nia hanoin kona-ba sá tipu apoiu tékniku mak sira presiza,” hateten Ministru Ivo.

Diskusaun di’ak tebes, parte-rua fahe informasaun ba malun oinsá mak hadia servisu no atividade sira iha área justisa.

Ministru Justisa iha oportunidade ne’e mós partilha informasaun em kazu partisipasaun Ministériu Justisa nian iha Komisaun Reforma Setór Justisa, dezenvolvimentu lei sira, no komprimissu VI Governu Konstitusionál ba lei sira ne’ebé agora dadaun iha Parlamentu Nasionál hodi diskute no aprova.

Akompaña Ministru Justisa iha reuniaun ne’e mak, Xéfi Gabinete Ministru Justisa Evangelino Belo.

Maria de Lourdes Xavier Lin
Media Officer
Gabinete Ministru Justisa