DILI, GMJ – S.E. Ministru Justisa Ivo Valente simu reuniaun kortezia hosi Country Representative Fundasaun Ásia nian iha Timor-Leste Sra. Susan Marx, Eis Xéfi Justisa do Tribunal de Recurso do Massachusetts EUA Juíz Philip Rapoza no Koordenadora OIS & Asesu ba Justisa Sra. Sophia Cason iha Gabinete Ministru Justisa, iha Dili, loron Segunda-Feira (07/03).

Reuniaun kortezia ne’e hodi fahe informasaun ba malun kona-ba questões asesu ba justisa; inklui aprezentasaun rezultadu survey ne’ebé Fundasaun Ásia halo kona-ba disputa rai no rezolusaun konflitu, violénsia doméstika no mós fahe perspetiva balun em relasaun ho servisu Komisaun Reforma Justisa.

Juíz Philip Rapoza ne’ebé akompaña Country Representative Fundasaun Ásia, hanesan Eis Juíz Internasionál no Koordenadór ba Painéis Espesiál ba Crimes Graves iha tinan 2003 iha Timor-Leste ba ofensa sira ne’ebé komete durante okupasaun Indonésia kontente tebes mai hikas fali iha Timor-Leste, no hatudu prontidaun nafatin hodi ajuda Timor-Leste iha área kapasitasaun ba majistradu Timor-oan sira.

Ministru Justisa, Ivo Valente aseita abertamente ho apoiu Juíz Rapoza nian, importante ba aktualizasaun dezenvolvimentu setór justisa nian, presiza duni atu fó formasaun balun iha kurtu prazu, kursu komplementár ne’ebé sei bele hala’o iha tempu férias judisiál nian.

“Timor-Leste sei nakloke ba apoiu dezenvolvimentu setór justisa nian. Tanba-ne’e, ha’u sei lori kestaun ida ne’e ba reuniaun Konsellu Jerál Centro Formação Jurídica, ha’u labele deside mesak maibé sei koalia mós ho Presidente Tribunál Rekursu, Prokuradór-Jerál Repúblika, Defensór Públiku-Jerál, no konseleiru sira seluk hodi foti desizaun,” dehan Ministru Ivo.

Iha sorin seluk, Country Representative Fundasaun Ásia Sra. Susan Marx, koalia mós futuru apoiu Fundasaun Ásia nian ba Ministériu Justisa iha área kapasitasaun, kombate violénsia doméstika no mediasaun ba disputa rai.

Maria de Lourdes Xavier Lin
Media Officer
Gabinete Ministru Justisa