DILI, MJ – S.E. Ministru Justisa Ivo Valente lidera reuniaun regulár ba Konsellu Konsultivu Ministériu Justisa iha Sala Reuniaun Ministériu Justisa, loron Sexta-Feira (04/03).

Reuniaun ne’ebé involve diresaun hotu-hotu hodi halo aprezentasaun ba aktualizasaun servisu sira ne’ebé mak hala’o tiha ona iha fulan-Fevereiru liubá no planu servisu ba fulan-Marsu ne’e nian. Aliénde ne’e, Konsellu Konsultivu diskute mós regras ezekusaun atividade no orsamentu Ministériu Justisa nian iha Tinan Sívil 2016.

Ministru Justisa Ivo Valente iha nia abertura reuniaun Konsellu Konsultivu, fó oportunidade dahuluk ba Diretór-Jerál Ministériu Justisa Henrique de Oliveira Ximenes hodi halo apresiasaun jerál ba servisu sira ne’ebé atribuídu ba Diresaun Jerál nian.

Depois-de aprezentasaun Diretór-Jerál nian, Ministru Ivo kontinua fó tempu ba diretór idak-idak hodi hato’o sira-nia progressu servisu. Questões barak mak foka liu ba iha kestaun servisu levantamentu kadastru no progressu arendamentu propriedade estadu nian, preparasaun paraser jurídiku, auditória internál, dezafiu atendimentu públiku no fasilidades apoiu iha munisípiu sira, kooperasaun servisu ho ajensia internasionál iha Timor-Leste, formasaun ba majistradu foun iha Centro Formação Jurídica no rekrutamentu formadór internasionál, dezenvolvimentu detentu sira iha prizaun, divulgasaun lei no relatóriu internasionál sira, dezenvolvimentu servisu defensoria públiku nian, no asuntu diversus sira seluk tán.

Hafoin rona aprezentasaun hosi kada diresaun idak-idak no organizmu autónoma sira ne’ebé tutela ba iha Ministériu Justisa, Ministru Ivo husu ba diretór sira atu sevisu hamutuk no ezekuta orsamentu estadu tuir lei haruka.

“Ita-bót sira tenke servisu hamutuk, apoiu malu hodi nune’e servisu ne’ebé ita planu ona iha Planu Asaun Anuál 2016 Ministériu Justisa nian bele atinzi ho di’ak. Maibé, implementasaun do planu tenke kumpri nafatin rekijitus ezekusaun orsamentu ne’ebé lei haruka,” hateten Ministru Justisa.

Marka prezensa iha reuniaun ne’e mak; Diretór-Jerál Henrique de Oliveira Ximenes, Defensór Públiku Jerál Sergio de Jesus Hornai, Inspetór Jerál Lucas António da Costa, Diretór DNAF Crisogno da Costa Neto, Diretór DNSPRS Helder Cosme Marçal Belo, Diretór DNAJL Nelinho Vital, Diretóra CFJ Marcelina Tilman, Diretór DNRN Vitór da Costa Neto, Diretór DNTP-SC Romão Guterres, Diretór DNDHC Flaviano Leão Moniz no Xéfi Gabinete Ministru Justisa Evangelino Belo.

Maria de Lourdes Xavier Lin
Media Officer
Gabinete Ministru Justisa