DILI, MNEK – S.E. Ministru Justisa Ivo Valente prezide reuniaun Komisaun Nasionál Kombate Brankeamentu Kapitál no Finansiamentu Terrorismu (CNCBC-FT) iha Sala Reuniaun Instituto de Estudos Diplomáticos Ministériu Negósiu Estranjeiru no Kooperasaun (MNEK), iha Dili, loron Kinta-Feira (03/03).

Reuniaun ne’ebé involve váriu instituisaun ho ajenda lubun mak hanesan; halo diskusaun no aprova Áta Reuniaun Komisaun Nasionál nian iha loron 17 Novembru 2015 liubá, diskute esbosu Planu Estratéjiku Kombate Brankeamentu Kapitál tinan 2016-2020 antes lori ba iha Konsellu Ministru hodi aprova, no diskute esbosu Rejime Internál Komisaun Nasionál hodi hádalan funsionamentu sekretariadu nian iha futuru.

Aliénde ne’e, partilha mós informasaun kona-ba kestaun konteúdu relatóriu no avaliasaun mútua Timor-Leste nian ne’ebé tenke em conformidade ho padraun internasionál sira hafoin submete ba iha The Asia/Pacific Group on Money Laundering (APG), iha Sidney, Australia.

Prosesu diskusaun la’o di’ak tebes; mosu opiniaun oin-oin kona-ba importansia hari’i Komisaun Nasionál CNCBC-FT, área sira ne’ebé ligadu ho krimi brankeamentu kapitál no krimi transnasionál sira seluk, identifika no konklui instituisaun sira ne’ebé mak risku ba krimi brankeamentu kapitál, responsável liña-ministeriu nian, kooperasaun internasionál no relasaun rejionál, formasaun ba ajensia responsável sira, planu no estratéjia kombate brankeamentu kapitál no finansiamentu terorrismu iha Timor-Leste.

Marka prezensa iha reuniaun ne’e mak; Ministra Finansas Sra. Santina Cardoso, Adjuntu Prokuradora Dra. Zelia Trindade, Diretora Unidade Informasaun Finanseira BCTL Sra. Maria Sarmento, Komisaun Anti-Korrupsaun, Diresaun Jerál Alfandega, Polísia Nasionál Timor-Leste, Diresaun-Jerál Orsamentu Estadu, Ministériu Negósiu no Estranjeiru (MNEK), Ministériu Interiór, Komisaun Funsaun Públika, Diresaun Nasionál Assessoria Jurídika no Lejislasaun Ministériu Justisa, no instituisaun relevante seluk.

Maria de Lourdes Xavier Lin
Media Officer
Gabinete Ministru Justisa