Ministra Justisa Husu Tenki Servisu ho diak
DIRECTORES NACIONAIS nain 3, husi Diresaun Nasional Rejistus Notariadu(DNRN), husi Diresaun Nasional Assesoria Juridika nó Lejislasaun (DNAJL), husi Diresaun Nasional Serviços Prisionais e Reinsersaun Sosial (DNSPRS), Segunda, lokraik, 16 Maiu, 2011 simu posse husi Ministra Justisa no Prezidenti Funsaun Públiku.

Diretores hirak ne’ebé hetan Tomada de Posse iha Salaun Konferênsia Sentru Formasaun Jurídika ne’e mak, Nelinho Vital, hanesan Diretór ba DNAJL, Maria de Fátima Araujo hanesan Diretora ba DNRN no Hélder Cosme hanesan Diretór ba DNSPRS.

Iha Tomada de Posse ne’e Ministra Justisa, Lúcia Maria Brandão Freitas Lobato, hato’o agradesimentu ba Funsaun Públiku, liu-liu ba Ekipa Juri sira mak halo selesaun ba diretores nain 3 MJ nian.

Nia parte mos sente haksolok tambá husi sira nain 3, iha nain 2 mak wainhira Ministra assume nia kargu, haruka sira nain 2 hasai sira nia estudu majistradu, ne’e hanesan oportunidade mak sira nain rua hetan hodi bele lidera diresaun 2 ministeiru nian. Maibe ksolok liutan tamba bele hetan feto ida mak funsaun públiku fo fiar hodi lidera diresaun ida bo’ot ho servisu mak todan, komplikadu, problema mos barak.

Ministra hateten, wainhira simu responsablidade ne’ebé bo’ot ejize mos sakrafísiu, tamba dala-ruma ita sai bo’ot ita kontenti, tamba ema hotu haree ba ita ho ita nia pozisaun, maibe wainhira ita halao ita nia knár lor-loron iha ita nia servisu fatin ita hetan dezafiu bo’ot ne’ebé rekere ba ida-idak sakrifisiu ida bo’ot, halo nusa mak ita atu bele servi diak ita nia nasaun ne’e ba oin.

Tamba hanesan nasaun ki’ik mak foin harí ho dezafiu bo’ot mak iha, hau hanoin hotu-hotu tenki iha konsciênsia katak, iha kbít naton hodi fo duni ita nia kapasidade tomak atu servisu tuir ita nia knár iha servisu fatin lor-loron.

Ministra hato’o mos ninia agradesimentu ba eis-diretores nain tolu, tamba sira, antes atu sira husik sira nia kargu, sira mos hala’o sira nia knár ho responsablidade.

Hanesan funsionáriu publiku Ministra husu atu eis-diretoris sira atu fo nafatin apoiu ba servisu, wainhira servisu iha Ministeriu la’o diak hanesan mos kontribuisaun ita hotu nian ba nasaun.

Iha biban ne’e Prezidente Komisaun Funsaun Públiku, Libóriu Pereira hateten, ne’e hanesan ba dala rua Komisaun Funsaun Publiku (KFP) mai iha Ministeiru Justisa hodi fo posse ba funsionáriu sira ne’ebé atu asume kargu hanesan diretor.

Knár ne’ebé sira simu antes ne’e sira esforsu makas hodi bele asume kargu, maibe funsionáriu sira mos tenki prepara-án hodi simu ho laran wainhira funsionariu seluk mak asume hikas kargu mak túr bá. Tamba iha loron ruma wainhira Ministeriu halo avaliasaun funsinariu ne’ebé asume hela kargu bele tún husi kargu.

“Kareiras ne’ebé iha ne’e, funsionáriu ida-idak nian, maibe kargu ne’ebé mak xefia, funsionáriu hotu-hotu nian, hanesan tekniku superior tenki prontu atu lori solusaun ba instituisaun lalos atu lori problema ba instituisaun,” dehan Libóriu.*

Ananias Babo Horta
Media Officer Ministeiru Justisa.