DILI, MNEK – S.E. Ministru Justisa Ivo Valente abertura Reuniaun Komité Koordenasaun Estratéjika (steering committee) Komponente Justisa ba Programa Apoiu Governasaun Demokrátika Timor-Leste iha Sala Reuniaun Institutu Estudu Diplomátiku Ministériu Negósiu Estranjéiru no Kooperasaun (MNEK) iha Dili, loron Segunda-Feira (15/02).

Reuniaun estratéjika ne’e koalia kona-ba kontinuasaun programa apoiu justisa hosi União Europeia iha Portugál liu hosi Camões – Instituto da Cooperação e da Língua, I.P. ba Governasaun Demokrátika Timor-Leste ba fulan hirak tuir mai tán.

Iha nia diskusru Ministru Ivo, hato’o ninia agradesimentu ba União Europeia hosi Portugál liu hosi Camões - Instituto da Cooperação e da Língua ne’ebé durante ne’e realiza ona ajuda lubun no fundamentu tebes ba Polísia Sientífiku Investigasaun Kriminál (PSIK) no Câmara de Contas.

“Iha reuniaun ne’e ita rona ona aprezentasaun parseiru sira ba programa justisa nian, programa apoiu ba governasaun demokrátiku iha Timor-Leste, ita sai testamuña asaun, testamuña hosi servisu ne’ebé ita hala’o ona, ne’e bele hare’e hosi ferramentus ne’ebé ita iha dadaun,” dehan Ministru Ivo.

Ministru Justisa subliña liután, apoiu barak mak ita-bót sira fó ona ba setór justisa, maibé servisu diáriu barak mak hala’o sem publisidade tuir área ne’ebé ita hala’o, maske nune’e, ha’u fiar katak ita tenke foka liu ba futuru, maské iha obstakulu maibé seguru liu bainhira ita bele hakat liu dezafiu ne’ebé identifikadu.

Ministru Justisa, Ivo Valente iha biban ne’e mós informa kona-ba kondisaun PSIK nian depois-de hetan apoiu hosi Camões, total operasionalidade mak estabelese, nível atuasaun preventive no mós esforsu Câmara de Contas ba asaun represiva sira.

“Importante tebes esforsu hirak ne’e, hodi halo reforma ba setór públiku no governasaun di’ak, ne’ebé háktuir ona iha Planu Estratéjiku Dezenvolvimentu ne’ebé háksumik prinsípiu governasaun di’ak tenke orienta ba atuasaun Estadu nian hodi hala’o servisu ba sidadaun sira no Estadu Direitu Demokrátiku,” hateten Ministru Ivo.

Reuniaun Komité Koordenasaun Estratéjika (steering committee) Komponente Justisa hahu tuku 9:00 dadersan no ramata iha tuku 01:30 lokoraik.

Marka prezensa iha reuniaun ne’e mak; Presidente Tribunál Rekursu, Juiza Konseleira Maria Natércia Gusmão, Diretór Nasionál PSIK Vicente Fernandes e Brito, Defensor-Públiku Jeral Sérgio de Jesus Hornai, Embaixadora União Europeia iha Timor Leste Sylvie Tabesse, Embaixadór Portugál iha Dili Manuel Gonçalves de Jesus, Camões - Instituto da Cooperação e da Língua, I.P. Paula Barros, Diresaun Jeral Polítika Justisa hosi Ministériu Justisa Portugál Fernando Sousa Júnior, Assessór Ministru Justisa Timor-Leste João Pedro Campos, Xéfi Gabinete Ministru Justisa Evangelino Belo, Diretór-Jeral Henrique de Oliveira Ximenes, Diretóra Sentru Formasaun Jurídika Marcelina Tilman no Xéfi Investigadór PSIK Adino Cabral.

Maria de Lourdes Xavier Lin
Media Officer
Gabinete Ministru Justisa