Vise Ministru Justisa Dr. Ivo Jorge Valente halo lansamentu harii Fatuk Dahuluk (lançamento da primeira pedra )ba Uma Fatin Hakmatek iha Distritu Oe-Cusse iha loron 22 Marsu 2011.

Iha serimonia lansamentu ne’e Vise Ministru Justisa iha ninia diskursu hateten : ”Lei kontra violensia domestika, Lei numeru 7/2010 ejije ba Governu Timor-Leste atu koordena no dezenvolve didiak sistema fornesimentu ba vitima sira ho gratituita. Lei oan sira ne’e, inklui uma mahon ; servisu mediku ; representasaun mediku ; representasaun legal ; akonsellamentu ; protesaun no provisaun ba nesesidade baziku”.

Lansamentu ne’ebé partisipa mos husi Vise Presidente Parlamentu Nasional, Maria da Paixão no Sekretaria Estadu Promosaun Igualidade ne’e, Vise Ministru Justisa reforsa liu tan : “Iha lei ida ne’e, vítima sira tenke hetan informasaun kompletu kona-ba sira nia kazu ka sira nia prosesu, no servisu sira ne’ebé sira iha direitu atu simu. Politika justisa jéneru kria kriteriu ba fatin hakmatek ka uma mahon sira. Fatin hakmatek ka sentru hanesan fatin ida ne’ebé seguru no hodi kuidadu vítima sira. Fatin ida ne’e mos serve hanesan fatin akomodasaun temporaria ba loron ida ka loron rua de’it no fo asesu ba servisu espesializadu vitima violensia seksual sira ka violensia domestika sira ka abuzu ba labarik sira no pratika trafiku humanu”.

“Fatin hakmatek bele tau iha Hospital Rejional no klinika sira, fatin hakmatek sira hotu tenke halao operasaun gratituita ba kliente sira bazea ba prinsipiu naun diskriminativa vitima sira, normalmente, referidu ba akomodasaun krize nian liu husi hospital ka klinika sira” , Vise Ministru Justisa esplika.

Vise Ministru Justisa hatutan liu tan : “Hau kongratula ba PRADET, Ministériu Saude, Sekretaria Estadu Promosaun Igualidade (SEPI) ho doadores sira hanesan Ausaid no Spanish Cooperation ba sira nia inisiativa excelente hodi estabelese fatin hakmatek ida iha Hospoital Referal Distritu Oe-Cusse.”
Iha serimonia ne’e nu’udár Autoridades Estaduais ne’ebé asiste iha lansamentu ba fatin hakmatek ne’e inklui Vise Presidente Parlamentu Nasional, MARIA DA PAIXÃO ; Sekretaria Estadu Promosaun Igualidade (SEPI), IDELTA MARIA RODRIGUES ; Procuradora Geral da Republika, ANA PESSOA ; Sekretariu Estadu husi Asistensias Sosiais no Dezastres Naturais, JACINTO RIGOBERTO ; Representante UNMIT, FINN RIESKE NIELSON ; no Directora Pradet.
Hotu tiah serimonia lansamentu ne’e, iha lokraik, Vise Ministru Justisa halao mos vizita ba edifisiu Diresaun Nasional Registu Notariadu (DNRN) no Diresaun Nasional Terras Propriedade Servisus Cadastrais (DNTPSC) Distritu Oe-Cusse hodi hare no rona directamente konaba dificuldade sira ne’ebé diresaun rua ne’e infrenta no oinsa atu bele resolve.

JOÃO MAUPELO DA COSTA
RESPONSÁVEL pelas Relações Públicas e Divulgações