REPÚBLICA DEMOCRÁTICA DE TIMOR-LESTE

REPÚBLICA DEMOCRÁTICA DE TIMOR-LESTE

Diretriz

2/2008/IVGC/MS

KONA BA PROSEDIMENTU NOMEASAUN KARGU DIRESAUN NO XEFIA IHA MINISTÉRIU SAÚDE



Haré ba nesesidade atu nomeia funsionáriu nebé iha ba kargu diresaun i xefia, tuir Rejime Karreira no Kargu Diresaun i Xefia iha Administrasaun Públika;



Hodi prienxe kargu diresaun i xefia iha Ministériu Saúde (MS), tuir Estatuto Organiku foun,



Ministru Saúde, determina atu sai hanesan diretriz, buat hirak hanesan tuir mai ne’e:



1. Kargu Diresaun no Xefia iha MS inklui:



1.1. Diretor-Jeral MS;



1.2. Inspetor Gabineti Inspesaun, Fiskalizasaun no Auditoria;



1.3. Diretor-Jeral no Diretor sira iha servisu nebé pertense ba Administrasaun Indireta Estadu;



1.4. Diretor Nasional no Diretor Distrital Saúde;



1.5. Sub-Inspetor Gabineti Inspesaun, Fiskalizasaun no Auditoria, Adjuntu Diretor Distrital Saúde, Xefi Departamentu, Xefi Sentru Saúde, no Xefi Gabineti iha responsabilidade direta Diretor-Jeral;



2. Kritériu jeral atu nomeia funsionáriu ida ba kargu diresaun i xefia mak hanesan buat nebé determina ona iha Rejime Karreira no Kargo Diresaun i Xefia iha Administrasaun Públika, no mós Estatutu Organiku husi servisu nebé pertense ba Administrasaun Indireta Estadu.



3. Para alein de kritériu jeral, iha kriteriu adisional hanesan tuir mai ne’e:



3.1. Hatudu ona kompeténsia ka esperiensia iha funsaun diresaun eh xefia iha área saúde.



3.2. Iha karáter no personalidade hanesan líder, no iha esperiensia, no susesu wainhira servisu hanesan ekipa;



3.3. Hatudu ona kapasidade atu rezolve problema jestaun iha área saúde;



3.4. Iha dominiu ba língua ofisial no língua nebé uza iha servisu loron-loron, liu-liu inglês;



4. Kritériu hirak nebé temi iha pontu 3, sei aplika iha prosesu avaliasaun nebé sai hanesan pré-kondisaun ba funsináriu ida, atu bele konsidera hanesan kandidatu ba kargu diresaun i xefia.



5. Prosedimentu nebé tenki hala’o molok Ministru Saúde nomeia funsionáriu ida ba kargu diresaun i xefia, mak hanesan tuir mai ne’e:



5.1. Ministru Saúde forma Painel Júri ho kompozisaun ba kargu ida-idak eh grupu kargu ida, hanesan tuir mai ne’e:



5.1.1 Ba Diretor-Jeral MS no Inspetor Gabineti Inspesaun, Fiskalizasaun no Auditoria, Painel Júri sei kompostu husi Vise-Ministra Saúde, reprezentante ida husi Diresaun Nasional Funsaun Públika iha Ministeriu Administrasaun Estatal i Ordenamentu Territóriu (MAEOT), Asesor nain rua husi MS;



5.1.2 Ba Diretor-Jeral no Diretor seluk iha Servisu hirak nebé pertense ba Administrasaun Indireta Estadu, hanesan Ospital Nasional Guido Valadares ho Ospital Referensia sira (eseptu Ospital Referensia Maubisse), Institutu Siensias Saúde, Laboratóriu Nasional no SAMES, no mós ba Diretor Nasional ho Diretor Distrital Saúde, Painel Júri sei kompostu husi Vise-Ministra Saúde, Inspetor, Diretor-Jeral MS, representante ida husi Diresaun Nasional Funsaun Públika MAEOT, Asesor ida husi MS;



5.1.3 Ba Sub-Inspetor Gabineti Inspesaun, Fiskalizasaun no Auditoria, Adjuntu-Diretor Distrital Saúde, Xefi Departamento iha Servisu Sentral, Xefi Gabineti iha responsabilidade direta Diretor-Jeral MS, no Xefi Sentru Saúde sira, Painel Júri sei kompostu husi Inspetor, Diretor-Jeral MS, Diretor Nasional relevante, Diretor Distrital Saúde relevante, no Asesor ida husi MS.



5.2. Funsaun prinsipal Painel Júri mak hanesan tuir mai ne’e:



5.2.1 Halo avaliasaun ba funsionáriu sira nebé oras ne’e ezerse hela funsaun diresaun i xefia, inklui hirak nebé oras ne’e ezerse interinamente funsaun hirak ne’e, wainhira prienxe kritériu jeral nebé temi iha pontu 2;



5.2.2 Painel Júri bele mós konvida funsionáriu seluk iha MS nia laran, nebé prienxe kritériu jeral tuir pontu 2, hodi tuir avaliasaun hanesan mós kandidatu ba kargu diresaun i xefia;



5.2.3 Hato’o rekomendasaun ba Ministru Saúde atu nomeia funsionáriu iha nebé iha kompeténsia liu, atu ezerse kargu diresaun i xefia nebé iha.



5.3. Avaliasaun tenki hala’o tuir mekanismu hanesan tuir mai ne’e:



5.3.1 Avaliasaun ba kritériu nebé temi iha pontu 3, sei ha-la’o ho baze ba ida-idak nia kurrikulu, no informasaun nebé MS iha kona ba sira ida-idak nia dezempeñu;



5.3.2 Atu reforsa prosesu avaliasaun, Painel Júri bele husu ba funsionariu nebé tuir avaliasaun, atu prienxe formuláriu ida, nebé nia rasik halo avaliasaun ba nia a’an, hafoin bele husu mós ba superior ierarkiku no subalternu nain rua, atu prienxe formuláriu konfidensial, hodi fo’o sira nia opiniaun, kona ba kompetensia funsionáriu ne’e, tuir kritériu nebé temi iha pontu 3;



5.3.3 Painel Júri bele eskolla subalternu nain rua hanesan temi iha pontu 5.3.2 liu husi prosesu sorteiu.



6. Ministru Saúde mak iha kompetensia atu hola desizaun final kona ba rekomendasaun nebé Painel Júri hato’o ba nia. Desizaun ne’e, Ministru Saúde nia gabineti tenki hato’o, bele liu husi telefone, ba partisipante avaliasaun ida-idak, iha kedas loron nebé hakotu desizaun.



7. Wainhira funsionáriu nebé tuir avaliasaun la kontenti ho desizaun nebé Ministru Saúde foti, bele husu esklaresimentu ba Painel Júri, tuir prosedimentu hanesan tuir mai ne’e:



7.1. Hato’o pedidu esklaresimentu pur eskritu, masimu loron 1 liu tiha anúnsiu via telefone eh liu tiha loron 3 ba anúnsiu pur eskritu;



7.2. Painel Júri tenki fo’o resposta pur eskritu masimu iha loron 3 nia laran, hafoin simu tiha pedidu esklaresimentu, hodi esplika razaun nebé iha kona ba sira nia rekomendasaun;



8. Wainhira la kontenti nafatin ho esklaresimentu husi Painel Júri, funsináriu ne’e bele hato’o fali pedidu esklaresimentu ba Ministru Saúde. Resposta husi Ministru Saúde sai hanesan resposta final.



9. Avaliasaun no nomeasaun ba kargu diresaun i xefia sei ha-la’o ho sekuensia hanesan tuir mai ne’e:



9.1. Uluk liu, sei hala’o avaliasaun atu prienxe kargu Dire-tor-Jeral MS no Inspetor Gabineti Inspeaun, Fiskalizasaun no Auditoria;



9.2. Tuir fali, sei halo avaliasaun atu prienxe kargu Diretor-Jeral no Diretor iha servisu nebé pertense ba Administrasaun Indireta Estadu (eseptu Ospital Referensia Maubisse), no mós Diretor Nasional no Diretor Distrital sira;



9.3. Ikus liu, mak sei hala’o avaliasaun atu prienxe kargu Sub-Inspetor Gabineti Inspesaun, Fiskalizasaun no Auditoria, Adjuntu-Diretor Distrital, Xefi Departamentu iha Servisu Sentral, Xefi Gabineti iha responsabilidade direta Sekretáriu Permanenti, no Xefi Sentru Saúde sira.



10. Wainhira Ministru Saúde nomeia ona Painel Júri, painel ne’e tenki define kalendariu ida ba avaliasaun to’o nomeasuan, hafoin publika avizu ba funsionáriu hirak nebé sei tuir avaliasaun, minimu ho antesedensia semana ida.



11. Funsionáriu hotu nebé oras ne’e ezerse funsaun diresaun i xefia, no hirak nebé Painel Júri konvida atu tuir avaliasaun, tenki hatama sira nia Kurrikulu tuir modelu aneksu, iha semana ida nia laran, hafoin Painel Júri publika avizu.



12. Wainhira iha dúvida ruma kona ba konteúdu diretris ida ne’e, bele husu esklaresimentu ba Vise-Ministra Saúde ka Ministru Saúde.



Dili, 15 Janeiru 2008,





DR Nelson Martins, MD, MHM, PhD

Ministru Saúde