MINISTRA Justisa (MJ), Lúcia Lobato ho Ministru Negosiu Estranjeiru (MNE), Jacarias Albano da Costa no ministeriu Relevantes kria reunion iha Salaun VIP MNE nian Segunda, (23/8) foin lalais ne’e hodi deskuti konabá Passa Fronteira.

Iha diskusaun ne’e Ministra Justisa Lúcia Lobato, liu hosi ninia intervista ba jornalista sira hateten, wainhira koalia konaba passa fronteira entaun koalia mos sobre baliza entre TL ho Indonesia.

Ministeriu lobuk ne’e halao inkontru hodi haree kestaun tekniku ruma ne’ebé bele resolve.

Oras ne’e tuir Lúcia deskute ona hodi haree ba emite passa fronteira, liu-liu ba populasaun sira ne’ebé besik liu ba iha fronteira ne’ebé lor-loron halao sira nia negosiu tradisional inklui mos hala’o vizita ba sira nia familia iha fronteira.

Durante diskusaun koalia liu konaba oinsa atu muda modellu passa fronteira ne’ebé iha ona ba modellu ne’ebé foun.

Iha diskusaun refere hosi parte imigrasaun hateten, modellu ne’ebé iha la iha assinatura hodi entidade ne’ebé pronese passa fronteira, nune’e iha ne’ebá mos modellu passa fronteira ne’ebé iha kada livru passa fronteira ida bele aumenta tan deit labarik nain 2.

Maibe wainhira haree ba modellu passa fronteira hosi Indonesia nian iha kada livro ida bele aumenta tan ema nain lima.

Relasiona ho ema sira ne’ebé habosok labarik hodi faan ba estranjeiru hosi parte imigrasaun husu maske sei ho idade labarik maibe ida-idak tenki iha passa fronteira rasik nune’e hosi parte imigrasaun bele fasil atu halo kontrola.

Hatan ba duvidas refere, Xefe Departementu ba Emissaun Passaporte ne’ebé sai mos hanesan Xefi ba Passa Fronteira Ministeiru Justisa nian, Maria do Fatima de Araujo, hateten modellu refere la admiti duni wainhira sukat ho modellu passa fronteira Indonesia nian, tanba modellu passa fronteira Indonesia nian tuir ona estandar Internasional no bele autoriza ba sub distritu hosi distritu ne’ebé besik fronteira.

Maibe modellu passa fronteira TL nian tuir Fatima, bele autoriza deit ba postu ne'ebe aseita ona iha akordu entre nasaun rua, ho ida nee modellu passa fronteira TL nian sei troka iha tempu badak.

Partisipa iha enkontru ne’e mak Ministru Administrasaun ESTATAL, Arcangeilo Leite, Sekretariu Estadu Seguransa, Francisco Guterres, Komandante Polisia Imigrasaun Timor Leste, Reprezentante hosi Ministeriu Komersiu Industria no Ministeriu Finansas inklui mos Ministeriu Infrastrutura.

Ananias Babo Horta
Media Officer Gabinete Ministra Justisa