Dili, MJ: Segunda-feira (13/06) dader ne’e, Ministru Justisa Dr.Tiago Amaral Sarmento simu iha audensia Sekretariu Estadu Desportu e Juventude, Abrão Nokosiku no Prezidente Federasaun Futeball Timor-Leste, Francisco Martins da Costa Pereira Jerónimo, hodi deskuti kona-ba ba atribuisaun Kampo Demokrasia ba FFTL no arrendamentu ba Terrenu Estadium Munisípal Dili ne’ebé tuir planu FIFA liuhusi ninia reprezentante iha Timor-Leste, Federasaun Football Timor-Leste (FFTL) sei halo kontratu ho Governu TL hodi dezenvolve Estadium refere.


Hafoin reuniaun Ministru Justisa Dr. Tiago Amaral Sarmento entrega dokumentus rai ne’ebé atribui ba FFTL ne’ebé nu’udar reprezentante FIFA iha Timor-Leste.

“ Primeiru ita garadese tebe-tebes tanba Governu liuhusi Ministériu Justisa atribui fatin ida: mak kampo demokrasia ba FFTL ho Sekretariu Estadu Desportu e Juventude atu dezenvolve futeball iha ne’eba”, informa Ministru iha joint Press Conference ne’ebé hala’o iha Sala reuniaun Gabinete Ministru Justisa.

Kona-ba presu arrendamentu ba Estadium Munisípal Dili, ne’ebé planu sei konstrui husi FIFA, Ministru Justisa Dr. Tiago Amaral Sarmento esplika katak, arrendamentu Estadium Munisípal Dili entre Governu Timor-Leste ho FFTL, sei hein prosesu levantamentu husi ekipa teknika Diresaun Jeral Terras Propriedades nian. hafoin ne’e Ministru Justisa sei deside no fó presu ba arrendamentu, bazeia relatoriu levantamentu terrenu husi Estadium Munisípal Dili, no konstrusaun 100% responsavel husi FIFA nian.
“ Ida fali kampu boot Estadiun Munisípal Dili ne’e FIFA mak Dezenvolve 100% ho orsamentu sira nian, tanba ne’e governu liuhusi Ministériu Justisa halo kontratu Arrendementu ho FFTL”, tenik Ministru Justisa .

“Kontratu ne’ebé Ministériu Justisa halo ho FFTL ninia durasaun tinan 45, maibé sei kontinua kontratu ne’e to’o tinan 90, no sei selu arrendamentu ne’e bá estadu”, Ministru Justisa hahutan.
“FIFA mós sei responsavel buat hotu-hotu sira hakarak halo kampu iha Munisípiu 13 inklui Munisípiu Atauro, tanba ne’e ita agradese tebes i governu apoiu nafatin atu koopera ho FFTL hodi halo Arrendamentu bá kampu ne’ebé sira perzisa atu nune’e bele dezenvolve Futebol iha Timor-Leste no bele dada besik jogus internasional sira mai iha Timor-Leste”. Ministru Justisa hakotu.


Iha fatin hanesan Prezidenti FFTL Francisco Martins da Costa Pereira Jerónimo afirma, “loloos ne’e estadiun hari’i tiha ona i agora dokumentus los ona sira bá to’o iha ne’ebá la hein kleur tan sira submete dokumentus sira ne’e bá FIFA hodi halo tender ba kompania sira ne’ebé mak atu konstrui estadiun refere”.

“Ha’u mak husu duni bá FIFA atu halo tender internasionál hodi hare kompania ne’ebé mak iha esperiénsia halo ona estadiun” Prezidente FFTL hatutan.

Iha Fatin hanesan Regional Office Development Manager FIFA, Lavin Vigneh J ne’ebé partisipa mós iha reuniaun refere informa katak, sira hakarak Lori fila futeball internasional mai Timor-Leste “We want to bring back football to Timor-Leste, the last internasional match Timor-leste play was in 2015, every time the National team want to play, they need to go out” informa Regional Office Development Manager FIFA, Lavin Vigneh J.


“Ami hakarak lori fila Futeball mai Timor-Leste, no ita hatene Timot-Leste halo kompetisaun internasional ikusliu iha Timor, iha tinan 2015 no wainhira ekipa Nasionál hakarak joga sira tenke ba liur, nune’e ami hakarak lori fila Futeball mai Timor-Leste ” hakotu Regional Office Development Manager FIFA, Lavin Vigneh J, ne’ebé partisipa mós iha reuniaun refere.

13 Junu 2022
#Media_Gbainete_MJ