MINISTRU JUSTISA SIMU NO REUNIAUN HO EMBAIXADOR SUIÇA BA TIMOR-LESTE NO INDONEZIA NE’EBE HALO VIZITA MAI TIMOR-LESTE


Díli, MJ:Kuarta-feira (01/06) loraik ne’e, Ministru Justisa, Dr. Tiago Amaral Sarmento simu iha audensia Embaixadór husi Suiça mai timor-Leste Sr. Kurt Kunz iha knar fatin Ministériu Justisa, Rua Colmera, Dili.


Iha reuniaun entre Embaixadór Suiça, Sr. Kurt Kunz ho Ministru Justisa ne’e, deskuti asuntus importantre tolu mak hanesan:
Kona-ba Rekomendasoen ONU nian kona-ba hapara torturasaun ne’ebé mak sira apoiu hela entidades hanesan Provedoria Direitus Humanus no Justisa e AJAR ne’ebé halo advokasia iha setór Justisa nian.


Agora dadaun iha ona programa ida ba apoiu PDHJ, no PDHJ estabelese ona kooperasaun ida ho Ministériu Justisa, hodi fó formasaun ba Guarda Prizional sira husi estabelesimentu prizional tolu hanesan, establesimentu prizional Becora, Suai no estabelesimentu prizional Gleno - Ermera.


Diskusaun iha parte edukasaun nian Suica sei koopera ho Salesiano Dom Bosco hodi harí’i eskola ida iha parte Kaiwa, Uaimori, Viqueque.


Aleinde ne’e Sr. Embaixador Kurt Kunz, husu mós ba Timor-Leste atu apoiu sira nia kandidatura iha Konsellu Seguransa iha Nasoens Unidas. No sira mós kompromete sei apoiu Governu Timor-Leste ninia kandidatura iha Konsellu Direitus Humanus iha Nasoens Unidas.

Nune’e Ministru Justisa. Dr. Tiago Amaral Sarmento agradese ba prezensa husi Sr. Embaixador Suica nian iha Timor-Leste, hodi koalia kona-ba kooperasaun billateral ne’ebé iha ona entre Timor-Leste ho Suiça.


No husu ba Suiça atu apoiu kandidatura Timor-Leste nian ba Konsellu Direitus Humanus iha Nasoens Unidas no Timor-Leste mós sei apoiu sira (suiça ) ninia kandidatura ba Konsellu Seguransa iha Nasoens Unidas.


Kona-ba rekomendasoens sira ONU nian, Ministru esplika katak Ministériu Justisa sei koordena ho Ministériu Negosiu Estranjeiru no Koopersaun (MNEC-sigla Portugués) hodi hare ba implementasoens husi rekomendasoens hirak ne’e.


Ikusliu Ministru Justisa Dr. Tiago Amaral Sarmento mós husu atu Suiça bele fó asistensia ba setor Justisa Timor-Leste nian.
Informa deit katak embaixador Kurt Kunz hanesan embaixador Suica ba Indonezia no Timor-Leste, ne’ebe rezidente iha Indonezia.


01 Juñu 2022
#Media_Gabinete_MJ