SETP Marka Audénsia ho MJ Hodi Husu Orientasaun Servisu


SEKRETÁRIU Estadu Terras Propriedades (SETP) Eldino Rodrigue dos Santos, iha loron 5 fulan-Abríl 2022 foin lalais ne’e marka audénsia ho Ministru Justisa, Tiago Amaral Sarmento hodi kumprimenta nune’e mós hodi husu orientasaun servisu Terras Propriedade nian iha futuru.
Governante ne’e husu orientasaun servisu refere bazeia ba dekretu lei númeru 14/2018, orgánika Oitavo Governu Konstitusionál nian ne’ebé defini klaru katak, Vise Ministru no Sekretáriu Estadu sira la iha kompeténsia rasik.

Tanba ne’e, tuir Eldino Rodrigue dos Santos, nia parte presiza tebes delegasaun kompeténsia hosi Ministru Justisa, liu-liu kona-ba servisu saida deit mak Sekretáriu Estadu Terras Propriedades bele realiza iha iha insitiuisaun Terras Propriedades ne’ebé mak nia lidera.
Tuir membru Oitau Governu ne’e, oras ne’e iha servisu barak mak pendente hela iha Diresaun Jerál Terras Propriedades, tanba antés Eis Ministru Justisa Manuel Carceres terminia ninia mandatu hanesan ministru, kompeténsia hirak ne’ebé mak delega ba SETP no diresaun sira nia dada hikas (kaduka-red) tiha, nune’e implika tebes ba atividade no servisu sira iha Sekretáriu Estadu Terras Propriedades ho nia diresaun sira ho rajaun tanba seidauk iha simu orientasaun servisu hosi Ministru Justisa atuál.

Hanesan membru governu foun iha mandatu Oitavu Governu nian, Governante ne’e kompremete nia sei asegura servisu hirak ne’ebé iha ona, no sei kontinua servisu hirak mak durante ne’e la’o ona iha instituisaun refere.
Hatan ba prekupasaun SETP nian, Ministru Justisa Tiago Amaral Sarmento hateten, nia parte sei haree, nune’e iha tempu badak sei marka enkontru ho SETP hodi bele deskute antes fó orientasaun servisu iha Instituisaun Terras Propriedades.*

Ananias Babo Horta
Relasaun Públika SETP