Defensoria Pública Timor Leste (DPTL), hahu dia 9 to’o 10 fulan Abril tinan 2019 Defensor Público Geral Dr. Cancio Xavier ho Defensor Pública Geral Adjunta, Dra. Olga Barreto Nunes hamutuk ho nia-ekipa iha visita regular ba Defensoria Pública Municipal Covalima/Suai, equipa ne’ebé kompostu husi Secretário Superior Conselhu, Dr. Crecencio dos Santos ho Secretario Superior da DP, Dr. Joaquim Ramos da Costa Gonçalves, Oficial Justiça, Oficial Finanças, pessoal apoiu tékniku, desloka ba Município Covalima/Suai.

Iha visita cortezia ne’e, delegasaun ekipa Defensoria Públika ne’ebe cefia husi Defensor Público Geral konsegue realiza sorumutu ho Entidades iha Municipio Suai/Covalima. iha sorumutu ida ne’e Defensor Público Geral ho Defensor Público Geral-Adjunta hamutuk ho Secretario Superior da Conselhu ho Secretario Superior da Defensoria Pública halo vizita dahuluk ba Sede Defensoria Pública Covalima/Suai hodi hare kondisaun servisu no halo reuniaun geral hamutuk ho Defensor Público sira, Oficial Justiça no Funcionario Administratasaun hodi buka hatene progresu servisu no divikuldades nebe sira infrenta.

Abertura ba reuniaun geral iha sede Defensoria Pública Suai/Covalima, Dr. Manuel Amaral nudar Defensor Publico Responsavel iha Municipal Suai/Covalima, nia intervensaun katak fo bem vindo ba Defensor Publico Geral, Dr. Cancio Xavier ho nia ekipa tomak nebe hakat mai iha Sede Defensoria Publica Suai/Covalima hodi hare ami nia kondisaun lo-los nebe ami hasoru maka persiza Pessoal Informatika ida atu permanente iha ne’e hodi kontrola sistema SIGAJ (Sistema Integrado Gestão Administração Justiça) tamba sistema informatika ida ne’e azuda tebes servisu loron-loron nian, uza hodi servisu halo atendementu publico assistido sira, registu kazu Crime no Civil foun, halo distribuisaun processo ba Defensor sira hodi fo assistensia legal, hatama notifikasaun mai husi Tribunal no atu hare mos rekapitulasaun relatorio kada fulan-fulan, trimestral no annual bá kazu Crime ho Civil, tamba ne’e persiza lina internet nebe diak.

Seluktan maka Julgamento Movel tenque kontinua halao hodi Justiça ba besik povu tamba area Defensoria Pública prekore ba juridiksaun Suai/Covalima, Same, Maliana no Ainaro tamba ita nia povu ki’ibit laek sira dala barak balun simu notifikasaun julgamentu iha Tribunal Suai/Covalima maibe ho distansia nebe dook difikulta tebes ho transporte atu mai tuir julgamentu iha Tribunal, nomos dala barak arguido sira la hasoru malu ho nia defensor atu husu no hare konabá akuzasaun husi Ministerio Público molok ba tuir julgamentu. Dr. Manuel Amaral fo justifikasaun hirak ne’e tamba dala barak iha ne’e ami hasoru prekupasaun balun hato’o husi Arguido sira katak distansia Tribunal Suai/Covalima nebe dook tebes husi sira nia hela fatin.

Ekipa Defensor Público Geral ho DPG-Adjunta kontinua halao vizita cortezia ba entidades relevantes ho operador Judiciariu koalia konaba assuntu ne’ebé iha ligasaun ho servisus Defensoria Públika nian iha Municipio Suai/Covalima, nomeadamente bá hasoru, Dr. Alvaro Freitas nudar Juis Administrador Tribunal Municipal Suaia/Covalima, Dr. José Elu Chefi Procuradoria Municipal Covalima/Suai, Sr. Miguel Armada nudar Secretario Administrasaun Municipal Covalima/Suai, visita ne’e nia finalidade atu manten lasu amizade no koperasaun servisu hamutuk iha futuru hodi asegura asisténsia ne’ebé diak liu ba sidadaun sira nia direitu legítimo.

Durante halo sorumutu ho Autoridade Municipal, Operador Judicíario sira iha Municipal Suai/Covalima, Defensor Público Geral, hato’o mos katak Klinika Assesu ba Justisa ne’ebe iha ambitu Defensoria Pública Timor Leste, tamba haktuir ba Decreto Lei Número. 10/2017, artigo 22o, Statutu da Defensoria Pública nian.

Iha parte seluk mos Defensor Público Geral mos esplika katak sai hanesan estrutura integrantes ba Defensoria Pública ne’ebe fila-fali ba atendementu juridiku ba sidadaunn sira no kolektividades vulneráveis ne’ebe ho atuasaun iha area prevensaun mediasaun no buka solusaun ba konflitu sira ne’ebe akontese iha komunidade nia let. Iha servisu klinika ida ne’e, Defensoria Públika servisu hamutuk ho JNJ Advokasia no Belun nebe hetan apoiu husi UNDP.

Ekipa Defensor Público Geral, kontinua halao vizita cortezia ba Prissão Suai/Covalima hodi hasoru malu ho Director Estabelesimento Prissional ho Guarda Prisional sira. Iha sorumutu ida ne’e Dr. Cancio Xavier (Defensor Público Geral) husu direitamente ba Sr. Director Prissão atu informa lista estabelecimentu prisional ba Defensoria Pública Suai/Covalima atu nune’e Defensor nain tolu nebe koloka iha Suai/Covalima bele akompanha no hare metade de pena (½) ho Sinco Sexto (5/6). Depois de reuniaun hotu Defensor Público Geral ho nia ekipa halo vizita ba Dadur sira iha Prissão laran hodi foti kronologia Arguido Cipriano Verdial, data moris iha dia 01 fulan Janeiro tinan 1945, Loron tama ba prissão dia 17 fulan Janeiro tinan 2017, komete krime Abusu Sexual, hetan kondenasaun iha prissão tinan sanulu resin tolu (13 Anos), husi Municipio Suai/Covalima. Depois Defensor Público Geral entrega kronologia arguido nian ba Defensor Responsavel Municipal Suai/Covalima Dr. Manuel Amaral hodi hare andamentu processu no fo assistensia legal ba arguido.

Ultimu vizita halao iha PNTL Municipal Suai/Covalima. Defensor Público Geral ho nia ekipa iha oras ida ho balun nia laran halo reuniaun ho Comandante PNTL Superentidenti Sr. Antonio Maria de Sa, nia intervensaun katak Ami PNTL Municipal Suai/Covalima Autoridade Policia Prontu kolabora ho lasu amizade metin nafatin. Hau mos konhese diak Dr. Cancio Xavier actual Defensor Público Geral antes assume kargu ida ne’e sempre fo apoio ba membru Policia balun nebe komete krime. Superentidenti Sr. Antonio Maria de Sa, durante halao atuasaun iha terreno persiza mos hetan avaliasaun husi Defensoria Pública atu nune’e ami bele kuidadu liu tan bain hira esekuta Lei no Orden.

Durante Defensor Publico Geral halao vizita akompanhamentu husi Defensor Públiku Responsavel Dr. Manuel Amaral iha Municipiu Suai/Covalima ho Secretário da Defensoria Pública Dr. Joanico da Costa.