VIZITA CORTEZIA DEFENSOR PÚBLICO GERAL HO DEFENSOR PÚBLICO GERAL-ADJUNTA BA IHA MUNICIPIO BAUCAU

Defensoria Pública Timor Leste (DPTL), hahu dia 20 to’o 22 fulan Março tinan 2019 Defensor Público Geral Dr. Cancio Xavier ho Defensor Pública Geral Adjunta, Dra. Olga Barreto Nunes hamutuk ho nia-ekipa iha visita regular ba Defensoria Pública Municipal Baucau, equipa ne’ebé kompostu husi Secretário Superior Conselhu ho Secretario Superior da DP, Oficial Justiça, Oficial Finanças, pessoal apoiu tékniku, desloka ba Município Baucau.
Iha visita cortezia ne’e, delegasaun ekipa Defensoria Públika ne’ebe cefia husi Defensor Público Geral konsegue realiza sorumutu ho Entidades iha Municipio Baucau. iha sorumutu ida ne’e Defensor Público Geral ho Defensor Público Geral-Adjunta hamutuk ho Secretario Superior da Conselhu ho Secretario Superior da Defensoria Pública halo vizita dahuluk ba Sede Defensoria Pública Baucau hodi hare kondisaun servisu no halo reuniaun geral hamutuk ho Defensor Público sira, Oficial Justiça no Funcionario Administratasaun hodi buka hatene progresu servisu no problemas nebe sira hasoru durante halao sira nia funsaun hodi fo asistensia juridiku ba vuneravel sira berkore iha municipio 4 mak Baucau, Vique-que, Lospalos no Manatutu.
Durante loron rua nia laran Ekipa Defensor Público Geral ho DPG-Adjunta kontinua halao vizita cortezia ba entidades relevantes koalia konaba assuntu ne’ebé iha ligasaun ho servisus Defensoria Públika nian iha Municipio Baucau, nomeadamente bá Tribunal Municipal Baucau, Procuradoria Municipal Baucau, Administrasaun Municipal Baucau, no Policia Nacional Timor-Leste. visita ne’e nia finalidade atu manten lasu amizade no koperasaun servisu hamutuk iha futuru hodi asegura asisténsia ne’ebé diak liu ba sidadaun sira ne’ebe persiza hela assistensia juridiku.

Durante halao sorumutu ho Autoridade Municipal sira iha Baucau, Defensor Público Geral Dr. Cancio Xavier, hato’o mos katak Klinika Assesu ba Justisa ne’ebe iha ambitu Defensoria Pública Baucau sai hanesan estrutura integrantes ba Defensoria Pública ne’ebe fila-fali ba atendementu juridiku ba sidadaunn sira no kolektividades vulneráveis ne’ebe ho atuasaun iha area prevensaun mediasaun no buka solusaun ba konflitu sira ne’ebe akontese iha komunidade nia let. Iha servisu klinika ida ne’e, Defensoria Públika servisu hamutuk ho Comisaun Paz e Justiça no Belun.

Iha parte seluk Defensor Público Geral esplika katak, Objektivu principal ba Klinika Assesu ba Justisa nian iha vokasaun atu promove asesu justisa nian no direitu, garante no estimula dezenvolvimentu sidadaun sira nian, ne’ebe divulga husi meius Judiciais existente hodi hetan rezolusaun ba konflitu. Klinika Assesu ba Justisa dezenvolve atribuisaun sira ne’ebe maka ligadas ba nia objektivu maka 1). Servisu Referensia ba Sidadaun, 2). Halo Konsultasaun Juridika ka atendementu públiku. 3). Halo Mediasaun 4). Fahe Informasaun Juridika ka Divulgasaun liu husi Media komunikasaun, 5). Servisu para legais no rede asistensia juridiku ba vuneravel sira.
Durante vizita iha Municipiu Baucau hetan akompanhamentu husi Defensor Públiku Responsavel Municipal Baucau Dr. Gregorio José de Lima ho Secretário da Defensoria Pública Baucau Dr. Evaristo Faria.

Media Gabinete DPG