MINISTERIU JUSTISA SAI KOMISAUN ORGANIZADORA BA SELEBRASAUN LORON NASIONAL FUNSAUN PUBLIKU BA DALA V TINAN 2019

Ministériu Justisa (MJ) sai komisaun organizadora ba selebrasaun loron nasional Funsaun Publiku ba dala V ne’ebe monu iha loron 15 jullu 2019 ho tema “Hasae Asesu Sidadaun ba Justisa Laiha Exceção no Diskriminasaun.” Antes to’o loron refere iha atividade lubuk ida hanesan hahu ho abertura inklui kuda ai oan, iha mos animação no divertimentu, fó premiu ba funsionariu balun, kompetisaun coral, atividade desportu, jornada, vizita kortezia, seminariu nasional, programa sosial, doasaun ra’an, limpeza jeral, marsa saudavel, misa agradesimentu no enseramentu. Ba dahuluk, iha abertura inklui kuda ai oan simbolikamente hosi primeiru Ministru, Taur Matan Ruak iha edifisiu Ministeriu Finansa iha loron 15 marsu 2019.

Iha abertura Primeiru Ministru Taur Matan Ruak hateten “Hau husu ba funsionariu públiku atu serbi didi’ak hodi hadi’ak funsionamentu estadu li-liu sistema administrasaun. Ba entidade hotu atu konsentra hametin paz no estabilidade hodi halo desenvolvimentu ba rai doben ne’e, se la iha paz mak sei la iha dezenvolvimentu no konstrusaun estadu, hau agradese no fó parabens ba funsaun publika.”
“Ministériu Justisa iha tinan ne’e sai komisaun organizadora ho tema hasae asesu sidadaun ba justisa laiha exceção no diskriminasaun, signifika la iha diskriminasaun ne’e katak ema hotu hanesan iha lei nia oin, la hare ba riku, kiak, kiik no boot, hau sei halo mudansa estrutura no rekursu ba funsionariu sira nune’e bele atende públiku di’ak liu tan,” Tenik Ministru Justisa, Manuel Carceres da Costa iha edifisiu Ministeriu Finansa.

Iha loron ne’ebé hanesan, Presidente Komisaun Funsaun Publika, Faustino Cardoso iha abertura hatete katak loron 15 fulan jullu laos komemora aniversariu Funsaun Publika deit maibe komemora dia nasional ne’ebé iha ligadu ho aspetu sidadania. Hau agrdese ba Ministériu Justisa bem organizadu no prepara kapaz tebes no tuir mai ita iha aktividade kuda ai oan nudar eventu reflesaun atu konkista saida maka ita halo ona, failansu no difikuldade nudar progresu prestasaun serbisu ba publiku durante ne’e.

Iha loron dahuluk abertura ne’e partisipa hosi Primeiru Ministru, Membru governu balun, Komisaun Funsaun Publiku, Kuadrus Superiores Administrasaun Publika, Dirijentes Servisus Autonomos no entidade públiku sira seluk no funsionariu sira ne’ebé atu kuda ai oan iha Fatu-ahi Embaxada Cina no Ponte Comoro 3.(C)

Carmelindo da Silva Caetano
Tekniku Superior DNDHC MJ