POLÍSIA JUDISIÁRIA( PJ) PORTUGAL DISPONÍVEL APOIU SETÓR JUSTISA TIMOR-LESTE

Dili, MJ: S.E. Ministru Justisa Dr. Manuel Cárceres da Costa vizita edifísiu sede Polísia Judisiária Portugal hodi reuniaun ho Diretúr PJ Lisboa.
Rekoñesendu ba kontributo indelével PJ Portugal bainhira kriasaun Polísia Sientífika Investigasaun Kriminál (PSIK) Timor-Leste. Reuniaun importante ne’e koalia mós kona-ba protokolu hirak ne’ebé asina ona entre Ministériu Justisa Timor-Leste ho Portugal, nune’e Sexa Ministru Justisa Timor-Leste agradese ba estrutura PJ-Portugal hodi fó sira nia asistensia máximu ba instituisaun PSIK, liu-liu preparasaun rekursu umanu nomós kapasitasaun rekursu umanu iha área investigasaun ba membru PSIK, nomós apoiu ekipamentus hirak ne’ebé modernu sai hanesan fatór determinante hodi kombate krime hirak ne’ebé boot iha Timor-Leste.

S.E. Ministru Justisa akompaña husi Diretur Jerál Ministériu Justisa, Diretur Nasionál ba asuntu lejislasaun, Assesor Jurídikus nomós sekretaria Gabinete Ministru Justisa RDTL.
Hafoin halo enkontru ho Polisia Judisiaria –Portugal, S.E. Ministru Justisa Dr. Manuel Cárceres da Costa kontinua hala’o vizita importante ba Institutu Nasionál Medisina Legál ho Siênsiais Forenzes I.P, Portugal, ho objetivu atu hatene di’ak liu tan kona-ba importansia husi instituisaun ida ne’e nia papel iha área Judisiál.
Institutu ida ne’e mak sai hanesan fatin hodi halo siênsias forenze nomós medisina legal, inklui formasaun ba área refere (izemplu: anatomia patolójika forneze no jenétika forenze).

Prezidente Institutu Nasionál de Medicina Legal e Ciências Forenses I.P Portugal akresenta katak sira disponível atu fo apoiu nomós koopera ho Ministériu Justisa Timor-Leste hodi estabelese no fó formasaun rekursu umanu ba Timor oan sira atu nune’e Timor-Leste sei la depende ba país seluk bainhira presija halo teste nomós exame ba área refere iha futuru tamba prova médiku-legal konstitui elementu ida ne’ebé krusial bainhira iha Julgamentu ba kazu sira relasiona ho provas hirak ne’e.
S.E. Ministru Justisa Timor-Leste ho laran luak simu disponibilidade Governu Portugal nia komitmentu iha área importante ida ne’e.

4 Dezembru 2018

Media_Gabinete_MJ