Dili, MJ: Kuarta feira (19/09/2018) semana kotuk, hafoin halo enkontru ho Prezidente Autoridade Munisípiu Bobonaro no funsiunariu Ministériu Justisa iha munisípiu Bobonaro, S.E. Ministru Justisa, kontinua ba Munisípiu Covalima hodi haree direta kondisaun prizaun Suai nomós prizioneirus sira.

Vizita S.E. Ministru Justisa nian ba munisípiu Covalima, hahu ho halo vizita ba iha Admnistrasaun Munisípiu Covalima hodi komprimenta administrador no funsiunariu sira. Iha sorumutu S.E. Ministru Justisa, hato'o objetivu halo vizita ba iha munisípiu Covalima, aleinde ne'e kolia mós kona-ba prosesu atu halo desentralizasaun ba servisu setór Justisa nian iha munisípiu sira, especial iha Covalima.

Hafoin iha loron tuir mai, Kinta feira (20/09/2018) dader, S.E. Ministru Justisa, akompanadu husi Sekretariu Administradór Munisípiu, Diretór Nasionál Servisu Prizionais no Reinsersaun Social (DNSPRS), Helder Cosme no Diretór Nasionál Rejistu Notariadu (DN-DNRN), João Borges, halo vizita ba iha prizaun Suai, hodi haree direta kondisaun prizaun Suai ne'ebé hahu funsiona iha Maiu 2017 refere.

Iha vizita S.E. halo enkontru uluk ho Diretór Prizaun Suai nomós ho guarda prizioneirus hotu, hodi rona direta dizafius no prekupasoen husi guarda prizioneirus sira, no S.E. Ministru Justisa komprometidu sei rezolve dezafius hirak ne'ebé guarda prizionais sira infrenta.

Hafoin hasoru malu ho guarda prizioneirus sira, Sr. Ministru Manuel Cárceres kontinua vizita prizioneirus sira. Iha sorumutu S.E. Ministru Justisa husu atu prizioneirus sira konsidera fatin refere nu'udar fatin hodi halo penetensia, nune'e bainhira, sai husi prizaaun bele sosializa ho diak iha komunidade sira, iha fatin sira hela ba.

Prizaun Suai, Covalima, hahu establese iha fulan Maiu 2017, hosi guarda prizioneirus nain lima ne'ebé lidera husi diretor Prizaun, Júlio Dias Ximenes no agora prizioneirus 41 mak detein iha ne'eba no ema hamutuk 41 mak servisu iha prizaun refere nuudar guarda Prizionais. Prizaun Suai Covalima estabele iha tempu okupasaun Indonezia, maibe la konsege uza iha tempu ne'eba.