Dili -Governu dahituk, S.E. Ministra Justisa Dra. Maria Ângela Guterres Viegas Carrascalão partisipa Serímonia Herois da Patria iha rotunda Prezidente Nicolão Lobato, loron domingu 31-12-2017.
Intervensaun hosi Sua.Excia. Prezidente Repúblika Dr. Francisco Guterres Lu Olo, husu ba povu Timor–Leste tomak kontinua dignifika herois patri ne'ebé maka fó ona sira nian vida ba prossesu luta libertasaun nasionál tanba hosi sira nia luta maka Timor-Leste hamrik hanesan paiz demokratiku iha mundu.Timor-Leste deside hili loron 31 Dezembru nu'udar loron herois hotu-hotu nian.

Tanba sa, Estadu hili loron 31 Dezembru loron atu fó honra no homenajen ba ita nian herois hotu-hotu? Estadu konsagra 31 Dezembru ho razaun especial ida. Saudozu Presidente Nicolão dos Reis Lobato hetan tiru no mate ho kilat iha liman, iha Mindelo, entre Maubessi, Turiscai no Manufahi, iha loron 31 Dezembru 1978. Saudozu Nicolão simboliza herois sira hotu ne'ebé sakrifika sira nian vida ba ita nian kauza nasional: hamrik nu'udar povu ho identidade rasik, hamrik nu'udar nasaun independente no soberania. Bainhira nia mate, saudozu Nicolão Lobato kaer kargu nu'udar Prezidente FRETELIN, Prezidente RDTL no Comandante em Chefe das FALINTIL. Lei ne'ebé konsagra 31 Dezembru nu'udar loron herois nian, aprova hosi Parlamentu Nasional, promulga hosi Sua. Excia. Prezidente Repúblika Taur Matan Ruak no públika iha jornal Repúblika, iha Novembru 2016.

Sua. Excia. Prezidente Repúblika hateten lista herois nian iha rohan-laek, barak ita hatene deit mak naran. Ita la hatene sira nian historia. Tuir Prezidente Repúblika, ita hotu hatene katak krize aat liu, iha sosiadade ne'ebé mak krize moral, krize prinsípius no valores. Nune'e importante tebes kaer metin prinsípius no valores sira ne'ebé dignifika ita nu'udar ema. Familia mak responsavel dahuluk ba hakiak ba beibeik valores ne'ebé ita persiza hametin atu ita nian sosiadade bele lao ba oin ho susesu. Aliende de familia, eskola no instituisaun seluk hanesan Igreja sira no ita nian líder sira halao mós responsabilidade eduka ita, atu moris ho prinsípiu no valores. Saudozu Nicolão Lobato, oan mane bót liu hosi saudozu mestre katekista Narciso Manuel Lobato no saudoza Felismina Alves Lobato, ho alin sanulu resin rua, moris no bót iha uma-kain ida ne'ebé metin tebes-tebes ho prinsípiu ho susesu luta ba rai ne'e.

Tuir mai serímonia kari aifunan ba herois da patria iha rotunda Prizidente Nicolão Lobato hosi membrus VII Governu Konstituisional no partisipantes, Diplomata, NGO Internasionál, Xéfe Suku ho komunidade tomak.
Serímonia ne'e termina iha oras 11:32, fahe malu.