Ministériu Justisa Komemora Loron Direitus Umanus 10 Dezembru iha Munisipiu Bobonaro

Versão para impressão

Maliana – Ministériu Justisa (MJ) liu hosi Diresaun Nasional Direitus Umanus no Cidadania (DNDHC) komemora loron Direitus Umanus 10 Dezembru iha Maliana, Munisipiu Bobonaro, loron selebrasaun ne’e monu iha loron domingu entaun muda hodi selebra iha loron 13 Dezembru ho tipu atividade hanesan formasaun direitus umanus durante loron rua no jogu ba labarik sira hanesan halai ho berlindus, halai taru, baku pinpon, hahu hosi 12-13 Dezembru 2017.

Tema mundial ba komemorasaun loron direitus umanus internasional 2017 mak “hamutuk hodi luta ba justisa, iqualdade no dignidade umanu.” Iha loron dahuluk formasaun direitus umanus, Diretór DNDHC, Flaviano Moniz Leão hateten, “Ministériu Justisa tinan tinan sempre komemora loron diretus umanus 10 Dezembru iha Munisipiu sira no iha tinan ida ne’e nian ita komemora iha Munisipiu Bobonaro. Loron importante ne’e laos Timor-Leste deit mak komemora maibe ne’e universal ba estadu hot-hotu ho konsensia hodi komemora. Objetivu husi komemorasaun ne’e atu ita nia ajente estadu sira bele iha konesimentu kona-ba direitus umanus ho nune’e bele tau iha pratika moris loron loron hanesan servidor estadu.”
Iha loron hanesan, Prezidente Autoridade Munisipiu Bobonaro, Zeferino Soares dos Santos hateten “ ami orgulho tamba Ministeriu Justisa hili Bobonaro hodi komemora loron direitus umanus. Ita tau importansia ba loron ida ne’e no ho atividade sira hanesan formasaun ne’e bele lori ita hatene di-di’ak saida mak konseitu direitus umanus no ninia lalaok sira, hau sujere ita hotu akumpaña to rohan.”
Iha sesaun formasaun direitus umanus loron rua ne’e Ministeriu justisa fasilita hamutuk ho ajensia Unidade Asesora Direitus Umanus ONU no Policia Departementu Justisa nian. Materia sira ne’ebe transmite hanesan, Konseitu Direitus umanus, Mekanismu Direitus Umanus, Konvensaun Kontra Tortura no Tratamentu A’at Dezumanu, Prosediementu Hato’o Keixa no Politika Uza Forsa. Partisipante ba formasaun ne’e mak hanesan hosi lideransa munisipiu no membru, lideransa komunitaria, Profesor/a sira, PNTL, CNE, Bombeiros nomos funsionariu sira iha ministeriu oi-oin hanesan Saude, MAE no seluk tan. Antes fahe malu DNDHC fó prezenti ba labarik sira ne’ebe manan jogus premeiru lugar to’o terseiru lugar (halai ho berlindus, halai taru, baku pinpon)
Iha enseramentu, Diretór DNDHC, hato’o agradese ba apoiu husi Prezidente Autoridade munisipiu ho nia membru tomak ne’ebe organiza atividade ida ne’e ho suksesu.
Aleinde ne’e, iha mós lia menon hosi Komandante PNTL seksaun justisa nian Super Intendente, Orlando Gomes, Liuhosi tipu atividade ne’ebe ita hala’o ona ne’e bele hasae kuiñesimentu ajenti estadu sira li-liu Policia para evita asaun sira ne’ebé viola direitus umanus.

Carmelindo da Silva Caetano
Tekniku Superior, DNDHC MJ