MANATUTO – Hahu loron 27 to’o 28 fulan-Novembru 2017, S.E. Vice Ministru Justisa ba Governo dahituk nian Dr.Sebastião Dias Ximenes hala’o atividade oin-oin, simultáneamente iha Munisípiu Manatuto hodi komemora Loron Independénsia Timor-Leste ba dala-42.
Komemorasaun Loron Independénsia Timor-Leste ba dala-42. ne’e nu’udar atividade Estadu nian ne’ebé hala’o simultaneamente iha Munisípiu hotu-hotu. No iha tinan 2017, serimónia Estadu lokalizadu iha Munisípiu Suai ne’ebé preside rasik hosi S.E. Prezidente Francisco Guterres LÚ Olo.

Relasiona ho komemorasaun Loron Independénsia Timor-Leste ba dala-42 ne’e, Vice Ministru Justisa foti kna’ar distintivo pessoal ka inspector ba serimónia Isár Bandeira Nasionál ba Loron komemorasaun Independénsia Timor-Leste ba dala-42 iha Kampu Administrasaun Munisípiu Manatuto, iha loron Tersa-Feira (28-11-2017).
Serimónia kuaze oras 2 ne’e, S.E. Vice Ministru Justisa ba Governo dahituk nian Dr.Sebastião Dias Ximenes le’e diskursu husi S.E. Prezidente Francisco Guterres LÚ Olo, Ba povu tomak, liu-liu ba povu Munisípiu Manatuto.

Iha diskursu ho pájina hamutuk 16 ne’e, S.E. Prezidente Francisco Guterres LÚ Olo husu ba povu tomak atu hatene prosesu ne’ebe hahu’u husi loron Proklamasaun Independensia iha loron 28 Novembro 1975, maka loke dalan ba ita atu kaer rasik ita nia Futuru ho puvu nia tulun, ita mana’n tamba lider sira fo’o liman b malu, funu nain sira fo’o liman b malu no funu nain sira no povu tanen malu.


S.E. Prezidente Francisco Guterres LÚ Olo husu mós Timor-oan sira-hotu atu kumpri duni Konstituisaun atu servi interese nasional, labele hali’is ba interese partidu nian no partidu ne’ebe deit iha Governo ka Opozisaun.
Ikus liu S.E. Prezidente Francisco Guterres LÚ Olo apela ba povu tomak atu hari’i paz no unidade atu hatuir hamutuk ita nia objectivus maibe ho prinsipoi no valores.

Hafoin isár bandeira, Vice Ministru justisa Dr.Sebastião Dias Ximenes Hafoin remata serimónia isár bandeira, aprezenta dansa cultura no tebe-tebe hosi estudante Munisípiu Manatuto nian, depois ne’e, foto hamutuk ho autoridade local sira, veteranu no antigos kambantantes, polísia no estudante sira.
Marka prezensa iha Isár bandeira ne’e mak; Direjentes Munisipiu Manatuto, veteranus, antigos kombatentes, funsionáriu públiku, Administradór no Administradór Postu Munisípiu Manatuto, líder komunitáriu sira, profesores, estudante, seguransa sivíl, PNTL, parseiru dezenvolvimentu, direjente Ministériu Justisa, joventude, Igreja, sosiedade sivíl no mídia lokál.

Depois iha lokoraik tuku 05:00 OTL, S.E. Vice Ministru Justisa ba Governo dahituk nian kontinua inspetór ba serimónia arriár bandeira ba hodi komemora Loron Independénsia Timor-Leste ba dala-42. Serimónia arriár bandeira nasionál iha Munisípiu Manatuto hákotu ho susesu bo’ot.
Aliende ne’e, iha loron Segunda-Feira (27/11/2017), S.E. Vice Ministru JustisaDr.Sebastião Dias Ximenes tuir misa solene ba Loron Independénsia Timor-Leste ba dala-42. iha Igreja Paroquia Santo Antonio ne’ebé selebrada hosi Amo Paróco Manatuto, Pe.Ipolito Fernades.

Iha nia homilia, Pe.Ipolito Fernades. hateten kona-ba herói nasionál Prezidente Nicolau Lobato ne’ebé hahú hari’i konseitu nasionalismu.Tanba-ne’e, hanesan jerasaun foun, no jerasaun agora dadaun ne’e atu hahí unidade no paz ba Timor nia futuru ne’ebe di’ak liu.
Iha oportunidade ne’e, Vice Ministru Justisa informa mos katak, “misa eukaristia iha Igreja Paroquia Santo Antonio hanesan pakóte selebrasaun aniversáriu Timor-Leste nian iha Munisípiu Manatuto.
Misa solone ne’e partisipa sarani sira iha Munisípiu Manatuto, estudante no direjentes ofisiais Ministériu Justisa ne’ebé akompaña Vice Ministru Justisa ba serimónia Estadu Isár Bandeira Loron Independénsia Timor-Leste ba dala-42.

Parabéns Timor-oan sira hotu!
Parabéns Povu Munisípiu Manatuto Tomak!
Parabéns Timor-Leste livre, buras no Independente!