EKIPA ICD-MJ JAPÃO HALO VIZITA TRABALHO BA DNAJL-MJ TIMOR LESTE

Dili Iha loron segunda-feira, 31 julho 2017, ekipa ida husi International Cooperation Department (ICD) Ministériu Justisa (MJ) Japaun, ne’ebe kompustu husi Hiromichi Onishi (Profesor-ICD), Tomoyuki Iwai (Procurador-ICD) no Mariko Kamada (Lejisladora-ICD) hahú vizita mai Timor-Leste, ho objetivu ida atu halo estudu hamutuk ho ekipa husi Direcção Naçional de Assessor Jurídica e Legislação (DNAJL) Ministériu da Justisa (MJ) Timor-Leste nian konaba implementasaun Lei no.13/2017 konaba Rejime ba Titularidade ba Rai no Propiedade nian. Alende ne’e, iha mos objetivu seluk husi vizita ida ne’e mak atu husu tuir fila fali rezultadu estudu hamutuk iha tinan 2016 nian konaba projetu ba lei mediasaun, projetu lei kazamentu nomos prosesu ba divorsiu nian.

Iha diskusaun ne’e, husi parte DNAJL aktualiza mos ba ekipa ICD katak, husi kolaborasaun entre parte rua ne’e, hatudu ona sinal pozitivu lubuk ida ba DNAJL hanesan bele termina duni projetu lei kontra droga nomos lei kontra trafiku humanu. Lei rua refere hetan ona promulgasaun husi Presidente Republika no publika tiha ona iha Jornal Republika. Husi diskusaun ne’e, partilha mos ba malu katak, atu implementa Lei no.13/2017, sei presiza atu halo tan regulamentu maizumenus hamutuk 17 tan, hanesan Decreto Lei konaba Kria Komisaun Nasional ba Rai nian, Lei konaba Protesaun Zona Komunitaria, Lei konaba Fundo Imobiliario (fundu atu selu ba rai ne’ebe ekspropia) no seluk tan.

Iha sorin seluk, Sr. Onishi, hanesan Xefe Ekipa husi ICD MJ Japão, hato’o mos sira nia kompremisu bot hodi hametin nafatin kooperasaun entre parte rua ne’e, tamba tuir nia katak, sira aprende-mos buat barak husi Timor Leste, liu-liu konaba nia sistema lejislasaun nian. Sira mos iha interese bot atu ajuda DNAJL no DNTP hodi estuda no elabora hamutuk regulamentu sira hodi kompleta Lei no.13/2017 konaba Nain ba Rai ne’e.

Hafoin, diskusaun ida ne’e, ekipa husi ICD Japão halo mos vizita no sorumutu teknika ho ONG Rede Ba Rai, Serviço Nacional de Cadastro (SNC), Diretor DNTP nomos sei halo vizita ba terreino hodi hatene klaru liu tan konaba problema rai ne’e. Husi atividade hirak ne’e, bele sai hanesan parte ida ba rekolha tan informasaun hodi hariku matenek ekipa lejislasaun ka lejislador sira atu nune’e, bele iha preparasaun diak liu tan ba elabora lejislasaun relasiona ho kestaun rai no propiedade. Progarama ida ne’e sei remata ida loron 8 agustu 2017.

Graziela/DNAJL