MINISTRU IVO VALENTE FÓ-POSSE BA DIRETÓR NA’IN-HÁT IHA MUNISÍPIU COVALIMA, SUAI

Versão para impressão

SUAI, MJ – S.E. Ministru Justisa Ivo Valente fó-posse ba Diretór Nasionál na’in-ida no Diretór Establesimentu Prizionál na’in-tolu (3) iha Munisípiu Covalima, Suai. Serimónia tomada de posse ne’e hala’o iha Edifísiu Konservatóriu Notariadu Munisípiu Covalima iha Suai, loron Kuarta-Feira (07/06/17) foin lalais liubá.

Kargu diretór nasionál ida (1) mak Flaviano Moniz Leão nu’udar Diretór Nacional dos Direitos Humanos e de Cidadania. Diretór na’in-tolu (3) mak hanesan: João Domingos, Diretór do Estabelecimento Prisional de Becora; Nito Maria dos Santos nu’udar Diretór do Estabelecimento Prisional de Gleno; no Julio Dias Ximenes, Diretór do Estabelecimento Prisional de Covalima.

Iha serimónia tomada de posse ne’e, akompaña Ministru Ivo Valente mak hanesan Reprezenta Komisaria Komisaun Funsaun Públika, Diretór Disiplinar Florindo da Costa, Diretór Geral Ministériu Justisa Henrique de Oliveira Ximenes.

Tomada de posse manifesta hosi prosesu rekrutamentu no selesaun tuir merítu ne’ebé Komisaun Funsaun públiku (KFP) hala’o em colaboração ho Ministériu Justisa tuir lei haruka. Prosesu selesaun dokumentus, ijame ho sistema eletróniku ho prosesu ida ne’ebé naruk, ne’ebé fasilita no superviziona hosi Sekretariadu Komisaun Funsaun Públika, nó mos balun tán hetan nomeiasaun por-subtituisaun, katak nomeiasaun por-subtituisaun iha prazu limitadu, no to’o tempu propoin halo fila fali nomeasaun foun no halo ijame merítu.

Ministru Ivo Valente iha ninia diskursu katak, “to’o tempu ona ita atu deskonsentra aktividade solene iha munisípiu sira, tamba iha signifikadu, sentidu bo’ot ida katak ita valoriza áktu solene Estadu ni’an iha munisípiu sira. Ohin ita halo tomada de posse ba Diretór Estabelecimentu Prisional Covalima, Diretór ida ne’ebé foun, husu ba Autoridade Munisípiu nian, Diretór sira, Amu sira, polísia, liña Ministeriais sira seluk ne’ebé iha ne’e, husu atu bele fo apoiu ba Diretór no ekipa prisonal foun iha Suai ida ne’e. Tanba, agora dadaun halo hela prosesu transferensia prizoneiru sira, no agora transferensia faze dahuluk ni’an, sei mai tan faze tuir mai, hodi hakbesik prizoneiru sira ho sira-nia família.”

Iha fatin hanesan, Ministru Justisa iha VI Governu Konstitusionál ne’e dehan mós katak, agora ita tama-ba era ida ne’ebé ema hotu-hotu uza matenek hodi konstrui Timor-Leste, dezenvolve ita-nia rai, agora Komisaun Funsaun Públika dezeña hela sistema ida atu kargu diretóris no chefia sira hodi buka ema ne’ebé intelektual, uza matenek hodi resolve problema. Tanba, durante tinan sanulu-resin-lima, barak mak nomeadu hanesan diretóris no chefia sem padraun ida ka kriteria ida atu define, ba-oin selesaun por-méritu ne’e hahú halo ona iha ministériu hát inkliu Ministériu Justisa, ne’e mak dehan era kompetisaun ho intelektualidade.

“Maibé laos atu dehan katak ho selesaun por-méritu ita sai perfeitu liu-ona, Funsaun Públika sei avalia ita hodi hare’e situasaun ne’e adekuadu on aka seidauk, responsável iha ka seidauk, tanba vantazen ho desvantazen sempre iha nafatin. Ita mos buka minimize desvantazen sira ne’e hotu, tanba teória ne’ebé ita hetan lahanesan ho pratika ne’ebé iha ita-nia oin, ne’eduni ha’u husu ba imi-hotu labele baruk atu aprende hosi ema ne’ebé iha espriénsia barak,” hatutan Ministru Ivo Valente.

Sorin seluk, Diretór-Jerál Ministériu Justisa Henrique de Oliveira Ximenes iha nia diskursu hateten katak, “foin lalais ne’e, loron hira liubá Ministériu Justisa halo tomada de posse iha nasionál, tanba antes ne’e sira liu-selesaun, sira prienxe ona rekijitus ne’ebé husi Komisaun Funsaun Públiku determina, durante ne’e maka Gabinete Diretór-Jeral koopera ho Komisaun Funsaun Públiku hala’o servisu ida ne’ebé rigorozu no ohin ita halo tán tomada de posse ba diretóris na’in-hát (4), iha Munisípiu Covalima.”

Iha fatin hanesan, reprezentante Komisaun Funsaun Públika mós hato’o lia-menon katak, lori Prezidente Komisaun Funsaun Públika ho komisáriu sira hato’o parabéns ba emposadus na’in hát ne’ebé ohin simu ona tomada de posse, tanba tuir selesaun por-méritu ne’e buat ida ne’ebé laós fásil, husu atu servisu didiak-ba tamba sai hanesan diretór laós buat ne’ebé kma’an mós, sai diretór laos atu foti a’an sai bót maibé sai atan hodi servi ita-nia povu, ita-nia komunidade sira. Agora to’o ona tempu atu konkretiza, hatudu ba ema hotu katak imi bele duni, imi liu hosi selesaun ne’ebé prosesu naruk, hosi faze ida ba faze ida.

Tomada de posse ba kargu Diretór iha Munisípiu Covalima hetan partisipasaun hosi; Diretór-Jerál Henrique de Oliveira Ximenes, Diretór diresaun Terras e Propriedade Sistema de Cadastros Munisípiu Covalima António Carceres Soares, Padre Paróco da Paroquia Munisípiu Covalima Pe. Sebastião Eugénio da Cruz Correia, Defensór Públiku Jeral Sérgio de Jesus Hornai, Diretór diresaun Konservatoriu Notariadu Munisípiu Covalima Lino do Nacimento, Sub-Inspetór Jaime Maia, Diretór DNAF Crisogno Da Costa Neto, Diretór PSIK Vicente Fernandes e Brito, Diretór DNDHC Flaviano Moniz Leão, Adjunto Komandante Polísia Munisípiu Covalima, Diretór Bombeiros Munisípiu Covalima Benjamin Amaral, Tribunal Distrital Suai, Chefe Suco, autoridade lokál, sosiedade sívil no seluk-seluk tán.

Maria de Lourdes Xavier Lin
Media Officer
Gabinete Ministru Justisa