MALIANA, MJ – S.E. Ministru Justisa Ivo Valente abertura atendimentu ba passaporte eletróniku iha Munisípiu Bobonaro. Lansamentu ne’e hala’o iha edifísiu Konservatóriu Notáriu Suai, Munisípiu Bobonaro, iha loron Sexta-Feira (2/06/17) foin lalais ne’e.

Lansamentu passaporte eletróniku ne’e, lansa husi S.E. Ministru Justisa Ivo Valente, no akompaña husi Prezidente Autoridade Munisípiu Bobonaro. Passaporte eletróniku iha Munisípiu Bobonaro sai hanesan munisípiu dahuluk hetan atendimentu ho teknolojia a’as, tanba ho razaun katak Munisípiu Bobonaro baliza ho fronteira ho nasaun viziñu, hodi ajuda komunidade sira bele hakat ba fronteira, aliénde ne’e, komunidade sira hetan difikuldade hodi trata dokumentus hodi hakat ba fronteira. Ho meius ida ne’e bele hafasil sira trata sira-nia dokumentu viajen.

Iha lansamentu ne’e, Ministru Ivo Valente hato’o nia deskursu katak, foin-lalais ne’e, Ministru Planeamentu Investimentu Estratéjiku Kayrala Xanana Gusmão halo ona lansamentu ba passaporte eletróniku iha Nasionál ba Timor oan hotu-hotu, tuir planu estratejiku setór Justisa nian, liuhusi diresaun Nasional Registu Notariadu katak tenke hakbesik administrasaun Estadu ba komunidade sira, liu-liu área rurais.

“Tuir polítika Governu nian katak, Munisípiu Bobonaro ne’ebé sai hanesan Munisípiu dahuluk hetan atendimentu apropriadu, di’ak ho teknolojia a’as, aliénde Munisípiu Bobonaru baliza ho nasaun viziñu, no do’ok hosi Díli, presiza mós divíde atendimentu nune’e ema labele trata nia passaporte to’o iha Díli, ne’e katak, hahú ohin imi lalika ba Díli hodi trata passaporte eletróniku, bele halo ona iha Bobonaro, “esplika Ministru Ivo Valente.

Tuir planu no polítika Governu, atendimentu passaporte eletróniku sei loke mós iha RAE Oecusse, Munisípiu Covalima no Munisípiu sira seluk, maibé mandatu Governu nian hela fulan-rua (2) de’it ona, planu hirak ne’e sai fó ba governu ne’ebé sei tiur mai hodi kontinua tuir planu estratéjiku setór Justisa nian.

Ministru Justisa mos esplika oituan kona-ba prosesu passaporte eletróniku ne’e, katak passaporte eletróniku ne’e lori tempu naruk hodi establese, lori tempu naruk hodi konsulta ho tekniku hosi International Civil Aviation Organization (ICAO), kona-ba sistema modernu no padraun ne’ebé hatu’ur ona hosi ICAO. Ho abertura atendimentu ida ne’e, Ministru Ivo Valente husu ba Autoridade Munisípiu Bobonaro sira atu enkoraja informa ba komunidade sira liu-liu iha Bobonaru oan sira, sé posivel Munisípiu Covalima mós bele mai trata passaporte iha Bobonaro.

Partisipa iha lansamentu passaporte eletróniku mak hanesan; Prezidente Autoridade Munisípiu Bobonaro Zeferino Soares dos Santos, Adjuntu Komandante PNTL Munisípiu Bobonaru João da Costa, Komisária Direitu Labarik Maria Barreto, Amo Paróco da Paroquia Maliana Pe. Valerio Gusmão, Diretór-Geral Ministériu Justisa Henrique de Oliveira Ximenes, Diretór DNAF Ministériu Justisa Crisogno da Costa Neto, Diretór Konservatoriu Notariu Munisípiu Bobonaro João Maupelo, autoridades lokál, sosiedade sívil no seluk-seluk tán.

Maria de Lourdes Xavier Lin
Media Officer
Gabinete Ministru Justisa