MINISTRU IVO VALENTE ABERTURA REUNIAUN KONSELLU JESTAUN PROJETU APOIU BA PROGRAMA JUSTISA IHA TIMOR-LESTE

DÍLI, MJ – S.E. Ministru Justisa, Ivo Valente abertura Reuniaun Konsellu Jestaun Projetu hodi apoiu programa Justisa ne’ebé organiza hosi Programa Nasoins Unidas ba Dezenvolvimentu (PNUD) Timor-Leste. Reuniaun ida ne’e hodi deskute planu no apoiu doadores ba servisu setór justisa iha Sala Konferénsia UN House, Díli, loron Segunda-Feira (24/04/2017).

Reuniaun ne’ebé partisipa paíz doadór sira mak hanesan; Japaun, Korea no Brazil. Marka prezensa mós reprezentante Prezidente Tribunal Rekursu Dr. Deolindo dos Santos, Adjunta-Prokuradora Dra. Zélia Trindade, Defensór-Públiku Jerál Dr. Sergio Hornai, Centro de Formação Jurídica e Judiciário no Representante Residente do PNUD iha Timor-Leste Knut Ostby.

PNUD iha Timor-Leste mak fasilita reuniaun Konsellu Jestaun Projetu hodi rona progressu kooperasaun ho instituisaun justisa sira iha tinan 2016 nian, no diskute planu 2017. Diskusaun hirak ne’e atu oferese hanoin sira hosi benefisiáriu projetu ne’e rasik. Benefisiáriu projetu PNUD mak Defensoria Públiku, Procuradoria da Repúblika, Centro de Formação Jurídica e Judiciária no Tribunal Rekursu.

Iha ninia abertura Ministru Ivo Valente hateten, “hanesan benefisiáriu no responsável polítika Ministériu Justisa iha VI Governu Konstitusionál hakarak hato’o agradesimentu bót no apresia apoiu PNUD nian ne’ebé mak hahú kedan hosi tinan 2002; liu-liu doadór sira hosi Governu Japaun, Korea no Brazil ne’ebé haforsa dadaun instituisaun justisa sira e fó biban ba povu hodi asesu di’ak liután atendimentu justisa tuir Planu Estratéjiku Setór Justisa 2030.”

“Timor-Leste persiza nafatin tulun hosi ita-bót sira hodi reforsa dezenvolvimentu nasionál, liu-liu área justisa nian,” dehan Ministru Ivo Valente.

Iha biban ne’e, Ministru Ivo Valente mós ko’alia kona-ba meius kontribuisaun doadór nian iha kontextu oinsá estabelese mekanizmu ba implementasaun ordem advogado Timor-Leste hafoin Lei Ordem Advogado aprova iha Parlamentu Nasionál; nia mós agradese ba pasu reál ba apoiu konkretu sira mak hanesan konstrusaun fiziku Klinika Jurídika iha Defensoria Públika Munisípiu Covalima nian no husu atu nasaun doadór sira posível apoiu ba Governu tuir mai.

Iha fatin hanesan, Representante Residente do PNUD Knut Ostby hato’o mós nia agradesimentu ba prezensa Ministru Justisa no Embaixadór sira hosi Bazil, Korea no Japaun iha Reuniaun Konsellu Jestaun Projetu PNUD iha Timor-Leste.

Maria de Lourdes Xavier Lin
Media Officer
Gabinete Ministru Justisa