COVALIMA, MJ – S.E. Ministru Justisa Ivo Valente halo reuniaun ho Prezidente Interinu Autoridade Munisípiu Covalima Afonso Nogueira Nahak no Komandante Polísia Eugenio Pereira relasaun ho prosesu transferénsia prizionéiru ka dadur sira hosi Prizaun Becora, Díli ba iha Prizaun foun Suai, Munisípiu Covalima iha tempu besik ne’e.

Reuniaun ne’ebé hala’o iha Gabinete Autoridade Munisípiu Covalima iha loron Kuarta-Feira (13/04/2017) ne’ebé mak partisipa hosi; Prezidente Interinu Autoridade Munisípiu, Komandante Polísia Covalima, Xéfi Gabinete Ministru Justisa Evangelino Belo, Diretór Nasionál Servisu Prizionál no Reinsersaun Sosiál (DNSPRS) Helder Cosme Marçal Belo, Diretór Konservatóriu no Diretór Terras, propriedade Munisípiu Covalima no Assessor Ministru Justisa Joaozito Viana.

Ministru Ivo Valente iha nia-liafuan abertura reuniaun esplika kona-ba objetivu hosi reuniaun ida ne’e, nia husu kolaborasaun hosi autoridade munisípiu nian, inklui PNTL nia apoiu ba transferénsia dadur sira iha fim-de-mês iha Prizaun foun Suai ne’ebé mak halo ona inagurasaun iha fulan hirak liubá. Aliénde tanba sei halo dadaun prosesu rekrutamentu ba Guarda Prizionál nain 34 hodi destaka mai iha Suai. Tanba-ne’e, Ministru Ivo Valente husu polísia atu ajuda Guarda Prizionál nain 6 ne’ebé mak sei destaka mai hodi asegura dadaun funsionamentu Prizaun Suai.

“Relasaun ho apoiu PNTL nian, ha’u sei ko’alia ho Ministru Interiór no Komandante Jerál PNTL kona-ba asuntu ida ne’e, apoiu PNTL iha Suai importante tebes antes Guarda Prizionál mak halo hela dadaun selesaun destaka tiha ona mai iha ne’e,” hateten Ministru Ivo Valente.

Iha fatin hanesan, Prezidente Interinu Afonso Nogueira Nahak iha ninia intervensaun expresa katak, durante ne’e administrasaun munisípiu ho konservatóriu no terras propreidades ne’ebé túteladu Ministériu Justisa iha komunikasaun no kolaborasaun di’ak tebes.

“Em princípio, kolaborasaun ho servisu administrasaun túteladu Ministériu Justisa iha Munisípiu Covalima la’o di’ak tebes, ami sempre komunika no koordena servisu sira iha ne’e. Hanesan autoridade munisípiu, ami mós sei apoiu Governu hodi halo prosesu transferénsia ba ita-nia dadur hosi Díli mai iha Suai,” dehan Prezidente Interinu Autoridade Afonso Nogueira Nahak.

Prezidente Interinu ne’e mós informa katak, situasaun siguransa durante ne’e iha Covalima hakmatek, kazu kiik balun akontese wainhira tempu eleisaun maibé PNTL bele atu ho di’ak tebes, Covalima maske lokalizadu iha fronteira ho nasaun viziñu Indonésia maibé situasaun sei kontroladu.

Komandadete PNTL Munisípiu Covalima Eugenio Pereira fó-nia apoiu, nia promete atu koordena ho Diretór DNSPRS no Guarda Prizionál Suai nian hodi buka meius no planu oinsá apoiu malu hodi asegura funsionamentu Prizaun Suai.

Reuniaun ne’ebé kuaze oras-ida la’o ho amizável, ámbiente rona malu no nakunu ho komitmentu atu apoiu malu iha prosesu dezenvolvimentu nasionál, liu-liu oinsá asegura siguransa no funsionamentu Prizaun Suai nian.