MINISTRU IVO VALENTE PREZIDE REUNIAUN KONSELLU KONSULTIVU MINISTÉRIU JUSTISA DATOLUK IHA DÍLI

DÍLI, MJ – S.E. Ministru Justisa Ivo Valente prezide reuniaun Konsellu Konsultivu (KK) ne’ebé involve Diretór-Jerál, Inspetór-Jerál no Diretór sira-hotu iha ámbitu administrasaun Ministériu Justisa nian ba datoluk fulan-Marsu nian. Reuniaun ne’e hala’o iha Sala Reuniaun Ministériu Justisa, Díli, iha loron Kinta-Feira (29/03/17).

Ajenda reuniaun ne’e foku liu ba iha diskusaun prioridade servisu iha Diresaun Nasional Registu Notariadu (DNRN), diresaun ida ne’ebé bo’ot no toma-konta ba funsionamentu públiku nian; relasaun ho passaporte ho nia dezafiu sira, no progresu instalasaun ba sistema passaporte elektrónika ne’ebé sai sasuka ida ba ita-nia kualidade passaporte Timor-Leste nian. Diskute mós prosesu investigasaun no auditoria ne’ebé Gabinete Inspesaun no Auditoria halo ba funsionárius sira no patrimóniu estadu nian, no ikus mak Diresaun Nasional Servisu Prizonais e Reinsersaun Sosial (DNSPRS) hare’e kona-bá servisu prizonais nian, liu-liu kestaun funsionamentu Prizaun Suai iha tempu badak ne’e.

Aliénde ne’e, diskute no aktualiza mós servisu kada diresaun sira, no oinsá planu servisu ba fulan-Maiu nian, atu nune’e servisu hotu-hotu la’o tuir kalendáriu Planu Asaun Anuál 2017 ne’ebé trasa tiha ona.

Ministru Ivo Valente iha nia-lian abertura reuniaun ne’e hateten, ajenda diskusaun maiz importante atu diresaun respetiva toma-atensaun no tau iha prioridade atu nune’e programa ne’ebé planeadu tenke implementa tuir tempu ne’ebé determina ona.

“Ha’u husu ba diretór sira-hotu atu fó atensaun maka’as ba programa maiz prioridades ne’ebé em kauza ba povu nia intereses, passaporte eletróniku no destakamentu prizioneiru balun hosi Prizaun Becora, Díli ba Prizaun Suai nian,” dehan Ministru Ivo Valente.

Iha oportunidade primeiru fó ba Diretór DNRN, Vitór da Costa Neto hodi aktualiza servisu diresaun nian, inkluindu ko’alia progresu finalizasaun ba instalasaun ekipamentu passaporte eletróniku, no planu ba lansamentu Passaporte Eletróniku Timor-Leste (PETL). Iha nia esplikasaun, Diretór Vitór hateten, atendimentu ba passaporte no dokumentus ofisál seluk la’o baibain ho di’ak, tuir regras no regulamentu ne’ebé estabelese. Relasaun ho passaporte eletróniku, iha faze finaliazasaun ba instalasaun, hahú semana oin halo ona formasaun ba operadór ekipamentu hodi nune’e funsionáriu toma-konta ba passaporte eletróniku bele adapta ho sistema foun.

Iha fatin hanesan Diretór DNSPRS Helder Cosme Marçal Belo hateten, hodi funsiona Prizaun Suai, prosesu la’o dadaun, Guarda Prizionál iha faze selesaun hela, no sei destaka guarda balun hosi Prizaun Becora, Díli hodi asegura seguransa prizaun foun nian antes guarda foun hala’o sira-nia kna’ar.

Servisu seluk mak, prepara dadaun formasaun ba Guarda Prizionál hodi hala’o kna’ar iha Suai, kontinua halo selesaun ba guarda foun hamutuk ema 34 hodi fó apoiu ba Prizaun Suai, agora dadaun halo prosesu tenderizasaun ba kompañia sira ne’ebé mak sei fornese alimentasaun ba prizioneiru sira, tantu Prizaun Becora no Gleno, Munisípiu Ermera. Aliénde ne’e, diskute mós implementasaun Rejime Espesiál ba Guarda Prizionál sira, deslokasaun no saláriu baziku.

Inspetór-Jerál Ministériu Justisa, Lucas António da Costa iha ninia aprezentasaun ba relatóriu inspesaun ne’ebé hala’o ona hosi GIA hatudu katak, konsege detekta iregularidade balun ne’ebé komete hosi funsionarius no diretór balun, em kauza disiplina tempu servisu no dezempeñu iha ninia profesionalizmu.

Ministru Ivo Valente husu ba diretór sira atu esforsu maka’as liután, kreativu no anima nia funsionáriu sira atu servisu badinas, kontrolla no buka meius hotu-hotu atu labele iha tempu ba funsionáriu sira hodi gasta tempu saugati de’it.

Partisipa iha reuniaun Konsellu Konsultivu (KK) ne’e mak hanesan; Diretór-Jeral Henrique de Oliveira Ximenes, Inspetór GIA Lucas António da Costa, Sub-Inspetór Jaime Maia, Diretór DNRN Vitór da Costa Neto, Diretór DNAF Crisogno da Costa Neto, Diretór PSIK Vicente fernandes e Brito, Diretór DNDHC Flaviano Moniz Leão, Diretór DNAJL Nelinho Vital, Diretóra CFJJ Marcelina Tilman da Sillva, Diretór DNTPSC Romão Guterres, Defensor Jeral Públiku Sérgio de Jesus Hornai, Xéfi Gabinete Ministru Justisa Evangelino Belo, Xéfi Departementu Administrasaun DNRN Amandio Alves, Xéfi Departementu IT DNRN Pinso Sei-Sei Vieira, Assessor sira hosi Gabinete Ministru Justisa.

Maria de Lourdes Xavier Lin
Media Officer
Gabinete Ministru Justisa