MINISTRU IVO VALENTE HALO INSPESAUN BA INSTALASAUN EKIPAMENTU PASSAPORTE ELEKTRÓNIKU TIMOR-LESTE

Versão para impressão

DÍLI, DNRN – S.E. Ministru Justisa Ivo Valente hala’o inspesaun dereitamente ba prosesu instalasaun ekipamentu produsaun Passaporte-Elektróniku Timor-Leste (E-passport) iha Edifísiu Diresaun Nasionál Rejistu Notariadu (DNRN) Ministériu Justisa, Díli, loron Segunda-Feira (27/03/17).

Inspesaun ne’e aliénde hodi hare’e besik liután prosesu instalasaun ekipamentu ba sistema passaporte elektróniku nian to’o iha ne’ebé ona, oinsá servisu sistema passaporte elektróniku nian no siguransa dadus, Ministru Ivo hakarak atu buka hatene mós dezafiu sira, atu nune’e labele prejudika orariu lansamentu passaporte iha inísiu fulan-Maiu 2017.

Instalasaun ekipamentu produsaun Passaporte Eletróniku responsabiliza hosi Kompañia Internasionál Gemalto no Visimitra, sira halo instalasaun sistema passaporte elektróniku, no halo formasaun ba operadór Rejistu Notariadu hodi nune’e Timor-oan mak jere rasik.

Iha fulan-ida liubá ((10/02/17) Ministru Ivo Valente ho nian ekipa simu ekipamentus instalasaun ba sistema Passaporte Elektróniku nian, oras ne’e sistema passaporte elektróniku iha prosesu koneksaun, no hein hodi halo lansamentu passaporte eletrónika tuir data ne’ebé Governu determina ona, katak, lansamentu Passaporte Eletrónika Timor-Leste sei halo iha loron 05 Maiu 2017.

Iha fatin hanesan S.E. Ministru Justisa Ivo Valente mos husu ba Diretór Rejistu Notariadu Vitór da Costa Neto atu hare’e tékniku Information Technology (IT) nian ne’ebé atu halo-konta sistema refere, no hare’e mós ba tékniku IT sira ne’ebé atu aranka ba nasaun sanulu (10) hodi halo konsultasaun katak Timor-Leste oras ne’e iha ona passaporte elektróniku ne’ebé tuir estandarizasaun ne’ebé hatu’ur ona hosi International Civil Aviation Organization (ICAO). Hosi nasaun sanulu (10) ne’e sei tau prioridade ba nasaun lima (5) lai ne’ebé Timor-oan hela bá.

Akompaña S.E. Ministru Justisa Ivo Valente iha inspesaun mak hanesan; Diretór Jeral Henrique de Oliveira Ximenes, Sub-Inspetór Jaime Maia, Diretór DNRN Vitór da Costa Neto, Diretór DNAF Crisogno da Costa Neto, Xéfi Departementu Administrasaun DNRN Amandio Alves, Xéfi Departementu Passaporte Suzana Petronela, Xéfi Gabinete Ministru Justisa Evangelino Belo, Xéfi Departementu Arkivu Nelson Moniz, Staff Gabinete Inspesaun no Auditoria Ministériu Justisa, Xéfi Departementu IT DNRN Pinso Sei-Sei Vieira, Assessór Ministru Justisa Joaozito Viana.

Maria de Lourdes Xavier Lin
Media Officer
Gabinete Ministru Justisa