DÍLI, MJ – S.E. Ministru Justisa Ivo Valente halo reuniaun ho Diretór Forum ONG Timor-Leste (FONGTIL) Sr. Arsenio Pereira kona-ba apoiu Estadu nian ba “Deklarasaun Páz no Hapara Funu” - Declaration on Peace and Cessation of War iha Gabinete Ministru Justisa, Díli, loron Segunda-Feira (27/02/2017).

Deklarasaun Páz no Hapara Funu – Declaration on Peace and Cessation of War hanesan movimentu internasionál páz nian ne’ebé inísia hosi ONG Internasionál hanaran HWPL iha Korea do Sul hodi promove Heavenly Culture, World Peace and Restoration of Light ho ramu organizasaun mak International Women Peace Group (IWPG) no International Peace Youth Gorup (IPYG).

Hanesan paíz pós-konflitu no haka’as án dezenvolve demokrasia, Timor-Leste kontinua promove páz. FONGTIL nu’udar parseiru Governu no organizasaun naun-governamentál (ONG) kontinua kolabora hodi promove páz no fó apoiu ba movimentu internasionál sira atu promove páz iha Timor-Leste, no ba mundu tomak.

Ministru Justisa, Ivo Valente iha reuniaun ida ne’e afirma nia apoiu ba inisiativa di’ak ne’e. Nia kongratula Forum ONG ho lideransa Arsenio Pereira atu kontinua promove no halo advokasia páz iha Timor-Leste, liu-liu ativamente iha eleisaun jerál ne’ebé Timor-Leste hasoru dadaun.

“Konstituisaun RDTL garante no fó esperítu universalidade no igualdade hanesan baze hodi promove páz iha sosiedade Timor-Leste. Tanba-ne’e, laiha razaun ba ha’u atu labele fó apoiu ba movimentu internasionál ida ne’e,” afirma Ministru Ivo Valente.

Nia mós husu ba Diretór Arsenio Pereira atu kontinua halo komunikasaun no koordena ho Ministru Negósiu Estranjeiru no Kooperasaun (MNEK), no Provedór Direitus Umanus no Justisa; hodi nune’e instituisaun respetiva sira fó mós sira-nia apoiu ba Declaration on Peace and Cessation of War antez submete ba iha Nações Unidas.

Iha nia-ponto de vista, Diretór FONGTIL Arsenio Pereira husu ba Ministru Justisa atu fó apoiu ba Declaration on Peace and Cessation of War, hanesan asaun apoiu ba movimentu ONG Internasionál no Nasionál, hanesan Estadu lubun ne’ebé mak fó ona sira-nia apoiu hodi asina deklarasaun ida ne’e.

Reuniaun Ministru Justisa Ivo Valente ho Diretór FONGTIL Arsenio Pereira, marka prezensa mós Assessor Ministru Justisa, Joaozito Viana.

Maria de Lourdes Xavier Lin
Media Officer
Gabinete Ministru Justisa