DÍLI, MJ – S.E. Ministru Justisa Ivo Valente simu ekipamentu formasaun vokasionál hosi Sekretáriu Estadu Polítika Formasaun Profesionál no Empregu (SEPFOPE) Ilidio Ximens da Costa hodi apoiu formasaun ba prizionéiru sira iha Prizaun Becora, Díli, loron Segunda-Feira (20/02/2017).

Ekipamentu hodi apoiu formasaun vokasionál ne’ebé oferese hosi Governu, liu hosi SEPFOPE mak hanesan; mákina kostura, ferros (setrika), hena, kábas, furadór no seluk-seluk tán.

Iha serimónia entrega ekipamentu kostura ne’e, Ministru Ivo Valente agradese ba SEPFOPE, Sr. Sekretáriu Estadu Elidio Ximenes da Costa ne’ebé oferese ona sasan hirak ne’e, atu nune’e, prizionéiru sira aproveita hodi aprende súku ropa. Aliénde ne’e, husu ba prizionéiriu sira atu kuidadu sasan hirak ne’e, para que ema seluk mós iha direitu atu aproveita hodi aprende.

“Mákina kostura ne’e bele ajuda ita-bót sira hodi aprende súku ropa, hodi nune’e kuandu fila ona ba komunidade ita-bót sira iha ona abilidade ka skill hodi tulun imi hodi kontinua moris, bele hadalan ini atu buka osan hodi sustenta imi-nia moris no família,” dehan Ministru Ivo Valente.

Ministru Ivo Valente mós enkoraja prizionéiru sira, atu kontinua hadiak sira-nia komportamentu, nia ko’alia mós planu Governu nian atu loke tán prizaun iha Baucau no rehabilita Prizaun antigu Weberek iha Betano.

Sekretáriu Estadu Polítika Formasaun Profesionál no Empregu, Elidio Ximenes da Costa iha nia-intervensaun hateten, Governu liu hosi SEPFOPE oferese ekipamentu hirak ne’e atu hadia prizionéiru sira-nia kapasidade, nune’e wainhira integra án ba sosiedade sira iha ona kbi’it atu kontinua hala’o sira nia moris.

“Importante mak imi tenke iha vontade di’ak hodi aprende, e mesmo tempo hadiak nafatin imi-nia komportamentu atu nune’e fila lalais ba komunidade. Apoiu ne’e foin hahú, oituan-oituan, agora ita iha kbi’it atu apoiu mákina kostura eh aban bainrua Governu sei apoiu tán ekipamentu sira seluk,” promete Sekretáriu Estadu Elidio Ximenes.

Serimónia entrega ekipamentu, aliénde halo aprezentasaun muzika hosi Grupo Muzika Prizionéiru sira no halo dialogu ho prizionéiru sira, Ministru Ivo Valente ho SEPFOPE Ilidio Ximenes da Costa ho nia-ekipa tomak halo mós observasaun ba Prizaun Becora. Observasaun ne’e hodi hare’e besik kondisaun prizaun nian, inklui hare’e kondisaun Sentru Formasaun Vokasionál Prizaun Becora.

Akompaña Ministru Justisa Ivo Valente no SEPFOPE Ilidio Ximenes da Costa, Amo Francisco Barreto, directores SEPFOPE no Ministériu Justisa, Guarda Servisu Prizionál nian, Xéfi Gabinete sira, Mídia no seluk-seluk tán.

Maria de Lourdes Xavier Lin
Media Officer
Gabinete Ministru Justisa