MINISTRU IVO VALENTE SIMU EKIPAMENTU PRODUSAUN PASSAPORTE ELETRÓNIKU TIMOR-LESTE IHA EDIFÍSIU REJISTU NOTARIADU

Versão para impressão

DÍLI, DNRN – S.E. Ministru Justisa Ivo Valente ho nia-ekipa tékniku sira simu ekipamentu produsaun Passaporte Eletróniku Timor-Leste ka E-Passport iha Edifísiu Diresaun Nasionál Rejistu Notariadu (DNRN), Mandarin, Díli, iha loron Sexta-Feira foin lalais ne’e (10/02/17).

Ekipamentu ba produsaun Passaporte Eletróniku Timor-Leste (PETL) hosi Kompañia Internasionál Gemalto Oy, ne’ebé mak responsabiliza halo instalasaun makina produsaun passaporte no formasaun ba operadór Rejistu Notariadu nian.

Ekipamentu ida ne’e, tuir Ministru Ivo Valente katak, atu moderniza sistema passaporte tuir padraun internasionál no mós prátika komum ne’ebé hala’o iha nasaun sira seluk. Passaporte foun ne’ebe hanaran Passaporte Eletrónika Timor-Leste ka PETL, PETL ne’e sei uza sistema modernu no dadus pesoál sei tau iha microchip nia laran, hanesan padraun ne’ebé hatu’ur ona hosi International Civil Aviation Organization (ICAO).

Ekipamentu hirak ne’ebé simu ona no atu instala makina produsaun E-passport iha Registu Notariadu ne’e mak hanesan; pakote komputadoria em relasaun ho Central Processing Unit (CPU), monitor, digital monitor, camera, printer, no ekipamentu ba sentral arkivu nian.

Iha fatin hanesan, Ministru Ivo Valente mós hare’e besik aula sira ka fatin ba instalasaun makina, sentru arkivu, sentru ba teknolojia informatika no seluk-seluk tán. Aliénde ne’e, rona mós opiniaun tékniku hosi tékniku DNRN no kompañia kona-ba dezeña fatin, seguransa no prosesu kapasitasaun ba tékniku Ministériu Justisa.

Depois-de simu ekipamentu hosi Kompañia Gemalto Oy, Ministru Ivo Valente husu atu tékniku sira hare’e didi’ak espesifikasaun makina sira, nune’e labele prejudika fali funsionamentu produsaun no lansamentu passaporte eletrónika tuir data ne’ebé Governu determina ona, katak lansamentu Passaporte Eletrónika Timor-Leste sei halo iha fim-de fulan Abril 2017.

Akompaña Ministru Justisa, Ivo Valente iha prosesu simu ekipamentus no inspesaun fatin mak hanesan hanesan; Diretór Jeral Henrique de Oliveira Ximenes, Inspetór Ministériu Justisa Lucas António da Costa, Sub-Inspetór António de Fátima Maia, Diretór DNRN Vitór da Costa Neto, Diretór DNAF Crisogno da Costa Neto, Diretór DNTPSC Romão Guterres, Xéfi Departementu Administrasaun DNRN Amandio Alves, Xéfi Gabinete Ministru Justisa Evangelino Belo, Xéfi IT Ministériu Justisa Inocencio Alves, Xéfi IT DNRN Pinso Sei-Sei Vieira, Assessór Ministru Justisa Joaozito Viana.

Maria de Lourdes Xavier Lin
Media Officer
Gabinete Ministru Justisa