MINISTRU IVO VALENTE SIMU VIZITA KORTEZIA HOSI SECRETÁRIA DE ESTADO DOS NEGÓCIOS ESTRANGEIROS E DA COOPERAÇÃO PORTUGÁL IHA DÍLI

DÍLI, MJ – S.E. Ministru Ivo Valente simu vizita kortezia hosi Secretária de Estado dos Negócios Estrangeiros e da Cooperação Portugál Sra. Teresa Ribeiro iha Sala Reuniaun Ministériu Justisa, Díli, loron Sexta-Feira (03/02/2017).

Vizita kortezia kuaze minutu 40 ne’e, aliénde ko’alia progressu kooperasaun Portugál ho Timor-Leste iha área justisa, lider nain-rua ne’e mós troka lembranças ba malun hodi hametin liután lasu amizade entre nasaun rua ne’e.

Iha biban ne’e, Ministru Ivo Valente partilha nia bem-vindu no agradese apoiu Governu Portugál nian ba Timor-Leste hodi haforsa no hametin setór justisa, manifesta mós nia agradesimentu ba implementasaun protokulu kooperasaun ne’ebé Ministru Justisa paíz rua ne’e halo ona em termos apoiu ba paíz foun ne’e. Kooperasaun ne’e hadalan ona Ministériu Justisa Timor-Leste hodi haruka funsionáriu Diresaun Nasionál Rejistu Notariadu no Guarda Prizionál nian hodi tuir formasaun tékniku iha Portugál iha tinan kotuk (2016).

Ministru mós informa kona-ba prosesu rekrutamentu formadór no apoiu ne’ebé Portugál sei fó relasiona ho formasaun ba majistradu sira iha Centro de Formação Jurídica e Judisiária (CFJJ) Timor-Leste, nune’e mós juíz inspetór ba tribunais nian.

Secretária de Estado dos Negócios Estrangeiros e da Cooperação Portugál Sra. Teresa Ribeiro konvíviu ho apresiasaun ne’ebé partilha hosi Ministru Justisa Timor-Leste, no partilha Portugál nia prontidaun atu apoiu nafatin Timor-Leste tuir protokulu ne’ebé asina ona hosi paíz rua ne’e iha dezenvolvimentu judisiáriu.

Akompaña Ministru Justisa Ivo Valente iha vizita kortezia ne’e mak; Xéfi Gabinete Ministru Justisa Evangelino Belo, Diretór-Jerál Henrique de Oliveira Ximenes, Diretora CFJJ Marcelina Tilman da Silva, Diretór DNAJL Nelinho Vital, no tékniku sira iha ámbitu Ministériu Justisa.


Maria de Lourdes Xavier Lin
Media Officer
Gabinete Ministru Justisa