Munisipiu Manatuto – Ministériu Justisa (MJ) liuhosi Diresaun Nasional Direitus Umanus no Cidadania (DNDHC) komemora loron direitus umanus 10 Dezembru ba tinan ida ne’e nian iha Munisipiu Manatuto, komemorasaun ne’e ho atividade Formasaun Direitus Umanus, Jogus Infantil no Diskursu Publiku, hahu hosi loron 6 – 10 Dezembru 2016.

Organizasaun Nasaun Unidos determina loron direitus umanus monu iha loron 10 Dezembru ho nune’e universalmente kada pais iha obrigasaun moral hodi komemora loron historiku ida ne’e hodi mantein tane as valor dignidade umanu boot liu buat hot-hotu, nune’e mantein iha estabilidade no paz. Tema mundial loron direitus umanus 10 Dezembru tinan ne’e, “stand up for someone’s rights today”. Interpreta katak hamrik ou luta ba ema ruma nia direitu ohin loron.

Iha loron importantu ida ne’e iha Manatuto, reprezentante Ministru Justisa, Jaime Xavier Lopes atual Sekretariu Estadu Teras Propriedade hato’o mensazen, “gerra mundial pasadu implika mosu Deklarasaun Universal Direitus Umanus 1948, hahu husi tinan ida ne’e komesa komemora loron direitus umanus no dadauk komemora ba dala 68, ha’u hakarak enkoraja ema hotu-hotu iha Timor-Leste, liu-liu iha Munisipiu Manatuto atu respeita ema ida-idak nia direitu. Ita hamrik hamutuk hodi defende ema seluk-nia direitu ohin, aban no lor-loron tanba ida-ne’e hanesan pasu importante hodi promove no próteje direitus umanus iha Timor-Leste.”

Administrador Munisipiu Manatuto, Fernando D. Sousa Junior, iha abertura loron 10 Dezembru hatete katak agradese tebes ba Ministeriu Justisa hodi hili Munisipiu Manatuto mak sai tarjetu tinan 2016 hodi hala’o selebrasaun loron direitus umanus, liuhosi atividade hirak ne’e bele fo hanoin mai ita hodi haforsa di’ak liu tan importansia direitus umanus no aplika iha ita nia moris lor-loron.

Komemorasaun loron 10 Dezembru, DNDHC MJ mai ho atividade oi-oin jogus infantil, Diskursu publiku inklui formasaun direitus umanus ne’ebé ita hala’o ohin loron ne’e hodi aumenta komunidade sira nia kuiñesimentu kona-ba direitus umanus, dehan Diretor DNDHC, Flaviano Moniz Leão bainhira hato’o objetivu programa iha sala formasaun Administrasaun Munisipiu Manatuto, tersa (6/12/2016).

Iha loron dahuluk ekipa tekniku DNDHC fó formasaun direitus umanus kona-ba Konseitu Jeral Direitus Umanus nomos Rezime Juridiku Uza Forsa (Dekretu lei Nu. 43/2011), ba loron daruak iha Jogus Infantil no iha loron 10 Dezembru iha kompetisaun Diskursu Públiku. Manan nain ba jogus infantil (berlindu no Pinpon) permeiru lugar to’o terseiru lugar hetan buat falun oan ida (Pasta, Kadernu no Lapizera) fó tuir valor (I-III). Ba manan nain permeiru lugar to’o terseiru lugar ba kompetisaun Diskursu Públiku hetan prezenti hanesan Piala nomos Osan fó tuir valor (I-III), manan nain permeiru lugar (I) hosi alin Iria Fernandes, Estudante Eskola St. Antonio, Manatuto, segundu lugar (II) hosi alin Ursula Sousa, Estudante Eskola Kayrala, Manatuto no terseiru lugar (III) hosi alin Maria Luzinha, Estudante Eskola Kayrala, Manatuto.

Iha komemorasaun ne’e harame mós hosi grupu Drum band eskola oan sira iha Manatuto antes abertura nomos anima hodi lori aifunan no sunu lilin iha tasi ibun, aktu ne’e hanesan fo honra no hanoin hikas funu nain sira nia sakrifisiu no reza ba sira nia espiritu.

Komemorasaun ne’e partisipa hosi lideransa Munisipiu Manatuto, Komandante PNTL Munisipiu Manatuto, Administrador Postu, Sefi Suku ho elementus balun, Profesor/a, Estudante, reprezentante NGO nomos komunidade sira. (c).