SUAI, MJ – S.E. Ministru Justisa Ivo Valente ne’ebé akompaña hosi Diretór Nasionál Diresaun Nasionál Servisu Prizionál no Reinsersaun Sosiál (DNSPRS) Helder Cosme Marçal Belo, dirijente nasionais ámbitu Ministériu Justisa no autoridade Munisípiu Kovalima hala’o serimónia inaugurasaun ba Prizaun Suai ne’ebé mak lokalizadu iha Suku Debos, Munisípiu Kovalima, loron Sabadu (26/11/2016).

Inaugurasaun Prizaun Suai foti pasu importante balun tán ba servisu prinsipais VI Governu nian hodi halo alargamentu ba servisu prizionál nian tuir Planu Estratéjiku Setór Justisa 2030 hafoin liu ona prosesu naruk ida hodi halo rehabilitasaun ba prizaun antigu iha Suai, Munisípiu Kovalima.

Ministru Ivo Valente iha nia intervensaun hateten, “hanesan governante, konstrusaun prizaun foun ba paíz foun ida nu’udar pasu servisu di’ak hodi fó fatin seguru ba rehabilitasaun prizioneiru sira, maibé triste tanba aumenta prizaun signifika mós krimi aumenta dadaun.”

“Mehi Timor-oan sira, katak sasukat ba susesu Estadu Timor-Leste nian mak tenke reduz no taka prizaun sira,” dehan Ministru Ivo Valente.

Prizaun Suai kompleta ho Bloku tolu (3) no kada Bloku iha Sela lima (5) ne’ebé ho kada Sela ho kapasidade sei bele akumula prizioneiru ema nain-ualu (8), ho nune’e, Prizaun Suai sei akumula totál prizioneiru hamutuk ema 120 iha área judisiáriu Munisípiu Kovalima, Manufahi, Ainaro no Bobonaro.

Aliénde kompleta ho Sela ba prizioneiru sira, prizaun ida ne’e, kompleta ho Kapela (Igreja), uma ba vizitante sira no Aula Sentru Formasaun Vokasionál ba prizioneiru sira.

Inagurasaun ne’e marka ho serimónia kulturál hosi Lia-Nain Suai, no kontinua ho bensaun hosi Amo Sebastião Eugenio da Cruz Correia, Amo Paroquia Suai hala’o komesa hosi odomatan bót prizaun, bloku no sela prizionéiru sira, Aula Sentru Formasaun Vokasionál nian, Kapela Prizaun, dapur, Klinika, fatin guarda prizaun, gardu siguransa no gardu eletrisidade.

Iha sorin seluk, Señor Ministru Ivo Valente informa katak, “destakamentu prizioneiru sira hosi Díli sei halo iha tempu besik, depois de rekrutamentu ba Guarda Prizaun hamutuk ema 40 mak sei kolokadu iha Prizaun Suai, prosesu rekrutamentu la’o dadaun, kandidatu hamutuk 3,000 pesoas mak konkore no halo dadaun selesaun ba dokumentus ne’ebé lidera hosi Sr. Inspetór-Jerál Lucas da Costa no Sr. Salvador da Costa Fernandes.”

“Depois de Guarda Prizaun kolokadu ona, komesa halo mobilizasaun ba prizioneiru sira hosi Díli, tanba Prizaun Becora liu ona nia-kapasidade konforme padraun prizionál nian,” esplika Ministru Ivo Valente.

Iha inaugurasaun ne’e, Diretór DNSPRS Helder Cosme Marçal Belo mós le’e relatóriu ba prosesu inísiu apuramentu dadus ba rehabilitasaun prizaun tuan Suai, dezeñu no konsultória, dezafiu sira iha progresu konstrusaun to’o faze ikus nian, simu sávi hosi kompañia responsável ba projetu ida ne’e.

Rehabilitasaun Prizaun Suai halo hosi kompañia lokál Mar Vermelho Unipessoal, Lda. ho valór orsamentu hamutuk $1,078,046.64 dolár amerikanos.

Akompaña Ministru Justisa iha serimónia inaugurasaun ne’e mak; Diretór-Jerál Ministériu Justisa Sr. Henrique de Oliveira Ximenes, Inspetór-Jerál Sr. Lucas António da Costa, Diretór-Adjunto PSIK Sr. Adino Nunes, Xéfi Gabinete Ministru Justisa Evangelino Belo, Diretores iha ámbitu Ministériu Justisa, Administradór Interinu Kovalima Afonso Nugueira Nahak, Komandante PNTL Suai, autoridade lokál sira iha Munisípiu Kovalima no Assessor Gabinete Ministru Justisa Joaozito Viana.

Maria de Lourdes Xavier Lin
Media Officer
Gabinete Ministru Justisa