MINISTRU IVO VALENTE HALO AUDIÉNSIA HO KOMISAUN A PARLAMENTU NASIONÁL KONA-BA PROPOSTA ORSAMENTU MINISTÉRIU JUSTISA TINAN SÍVIL 2017

Versão para impressão

DÍLI, PN – S.E. Ministru Justisa Ivo Valente hamutuk Sekretáriu Estadu Terras no Propriedades (SETP) Jaime Xavier Lopes no dirijente ofisiál Ministériu Justisa tomak hala’o audiénsia públiku ho Komisaun A Parlamentu Nasionál (PN) kona-ba Proposta Orsamantu Ministériu Justisa nian ba Tinan Sívil 2017 iha Sala Konferénsia Parlamentu Nasionál, Díli, loron Kinta-Feira (27/10/2016).

Audiénsia públiku ne’ebé mak prezide hosi Prezidente Komisaun A, Comissão de Assuntos Constitucionais, Justiça, Administração Pública, Poder Local e Anticorrupção Dra. Carmelita Caetano Moniz, aliénde diskute Proposta Orsamentu Ministériu Justisa ba Tinan Sívil 2017, hodi buka hatene mós progressu ezekusaun orsamentu Ministériu Justisa nian ba tinan 2016 nian.

Ministru Ivo Valente iha ninia intervensaun hateten, “planu prinsipál Ministériu Justisa aliña ho programa temátiku-lima haktuir Planu Estratéjiku Setór Justisa 2030 sai baze ba formulasaun Planu Asaun Anuál, em felizmente implementasaun la’o di’ak, maske dalabarak ami tenke hasoru dezafiu oin-oin. Maibe, áte fim de fulan-Outubru, ezekusaun orsamentu Ministériu Justisa liu ona 90%, ne’e inklui ona ho komitmentu, ha’u fiar katak ami-nia ezekusaun programa no orsamentu sei la’o tuir faze determinadu.”

Ministru mós esplika kona-ba progresu reforma kuadru legál, dezenvolvimentu rekursu umanus, infra-estrutura no Téknolojia Informatika, desentralizasaun administrativa ba munisípiu sira no dezafiu ne'ebé povu hasoru relasaun ho asesu ba justisa.

Iha sorin seluk, Ministru Ivo Valente koa’lia mós formadu no formadór sira iha Centro Formação Jurídica, dezenvolvimentu Polísia Sientífiku Investigasaun Kiminál (PSIK), esforsu Governu hodi kontrata inspetór ba Defonsoria Públiku, no servisu terras propriedades no sistema kadastrais nian.

Aliénde fó apresiasaun ba progresu servisu Ministériu Justisa nian, mosu mós kestaun lubun ida mak levanta mai hosi Membru Komisaun A Parlamentu Nasionál. Deputadu sira husu progresu levantamentu Sistema Nasionál Kadastrál (SNC), okupasaun rai Estadu no medidas ne’ebé Governu foti ona, arendamentu rai Estadu, kestaun Passaporte Eletróniku - dijitál, dezenvolvimentu rekursu umanus no ekipamentu laboratóriu ba PSIK nian, liña koordenasaun PSIK ho PNTL, atendimentu defensoria ba povu ki’ak no seluk-seluk tán.

Relasaun ho kestaun hirak iha leten, Ministru Ivo Valente fó oportunidade ba Sekretáriu Estadu Jaime Xavier Lopes no Diretór PSIK Vicente Fernandes e Brito hodi hatán ba kestaun tékniku sira.

Depois-de aprezentasaun ezekusaun programa no orsamentu Estadu, Ministru Ivo Valente kontinua halo aprezentasaun ba Proposta Orsamentu Ministériu Justisa nian Tinan Sívil 2017.

Marka prezensa iha audiénsia públika ida ne’e mak Vise-Prezidente Komisaun A, Deputadu Arão Noé de Jesus da Costa Amaral, membru Komisaun A, no Diretór Nasionál sira, Assessor Nasionál, Xéfi Departementu iha ámbitu Ministériu Justisa.

Maria de Lourdes Xavier Lin
Media Officer
Gabinete Ministru Justisa