MINISTRU IVO VALENTE FÓ-POSSE BA AJENTE ADMINISTRASAUN ESTADU HODI ASUME KARGU XÉFIA IHA GABINETE DIRETÓR-JERÁL MINISTÉRIU JUSTISA

Versão para impressão

CFJ, MJ – S.E. Ministru Justisa Ivo Valente ne’ebé akompañadu hosi Diretora-Jerál Komisaun Funsaun Públika, no Diretór-Jerál Ministériu Justisa Henrique de Oliveira Ximenes fó-posse ba ajente administrasaun Estadu atu asume kargu xéfia iha Gabinete Diretór-Jerál nian no Kargu Xéfia Diresaun nian iha ámbitu Ministériu Justisa iha Centro Formação Jurídika (CFJ), Díli, loron Kinta-Feira (20/10/2016).

Iha ninia intervensaun hafoin serimónia fó-posse ba emposadu sira, Ministru Ivo Valente hato’o nia-apresiasaun ás ba funsionáriu públiku ne’ebé mak hetan fiar hosi Ministériu Justisa, no nia husu ba emposadu sira atu kontinua hametin koordenasaun servisu, tane deontolojia profisaun nian no obedese ba orientasaun órgaun superiór, hodi nune’e Ministériu Justisa hakat nafatin ba oin ho di’ak hodi atizi metas Planu Estratéjiku Dezenvolvimentu Nasionál.

“Hanesan direjente Ministériu Justisa, ita-bót sira foti parte ba futuru nasaun nian, tanba-ne’e, tenke hadia imi-nia relasaun ba malun nune’e empeña imi-nia servisu ho di’ak. Importante mak tau iha ita-bót sira nia neon katak, sucsesso ita-bót sira nian determina hosi imi-nia relasaun ho imi-nia kolega servisu rasik,” hateten Ministru Ivo Valente.

Ministru Ivo Valente esplika mós kona-ba aspetu jurídiku no medida implementasaun polítika VI Governu Konstitusionál nian em relasaun ho forma departementu sira iha Gabinete Diretór-Jerál Ministériu Justisa. Nia esplika liután artikulasaun Lei Órganika Gabinete Primeiru-Ministru no. 38/2016 no Decreto-Lei no. 22/2015 hodi estabelese estrutura ba entidade koordenasaun Unidade de Planeamento Monitorização e Avaliação (UPMA) iha órgaun no instituisaun Governu sira.

“Entidade ne’e nia-misaun mak atu koordena, organiza no superviziona prosesu planeamentu, monitoriza, avalia polítika no programa no mós orsamentu Estadu nian ne’ebé mak atribui ba iha Ministériu Justisa,” esplika liután Ministru Ivo Valente.

Nia enkoraja atu diretór sira no xéfi departementu sira atu kontinua halo koordenasaun no komunikasaun di’ak ba malu hodi implementa programa no atividade sira tuir Planu Asaun Anuál Ministériu Justisa nian. Tanba sucsesso direjente ida, tenke konta mós nia-sucsesso tanba hatene kolabora no tane nia-profisionalismu iha prátika.

Iha serimónia fó-posse ba xéfi departementu ne’ebé sei hala’o kna’ar iha Gabinete Diretór-Jerál, halo mós posse ba direjente diresaun sira ne’ebé mak extende sira-nia mandatu. Direjente sira ne’ebé kontinua nia kna’ar mak hanesan; Diretora Centro Formação Jurídica (CFJ) Marcelina Tilman, Diretór Diresaun Nasionál Direitus Umanus no Sidadania (DNDHC) Flaviano Moniz Leão, Diretór Diresaun Nasionál Rejistu Notariadu (DNRN) Vitór da Costa Neto, Diretora Konservatóriu Munisípiu Díli, no mós Xéfi Departementu balun.

Iha sorin seluk, Diretora-Jerál Komisaun Funsaun Públiku hateten katak, direjente administrasaun Estadu nu’udar servidór públiku nian, tanba-ne’e, tenke prontu atu sevi nia povu no Estadu. Hanesan mós kna’ar ne’ebé simu reflete idak-idak nia kompeténsia no konfiansa hosi nia-supeiór sira, tanba-ne’e, tenke fortifika liután instituisaun nia servisu hodi atinzi Planu Estratéjiku Dezenvolvimentu Nasionál.


Marka prezensa iha serimónia fó-posse ne’e mak; Inspetór-Jerál Ministériu Justisa Lucas António da Costa, Xéfi Gabinete Ministru Justisa Evangelino Belo, Pe. Franscisco Barreto, Diretór DNAF Crisogno da Costa Neto, Diretór DNSPRS Helder Cosme Marçal Belo, Xéfi Departementu sira, família emposadu sira, Assessor Ministru Justisa no funsionáriu públiku iha ámbitu Ministériu Justisa.



Maria de Lourdes Xavier Lin
Media Officer
Gabinete Ministru Justisa